Home Local Medidanan estricto pa entiero entrante maart y di otro banda riba weekend...

Medidanan estricto pa entiero entrante maart y di otro banda riba weekend ta keda “un free for all”

SHARE

Oranjestad – Diaranson merdia DVG a emiti pa prome biaha durante e pandemia un comunicado oficial unda a splica 8 punto na momento cu un persona fayece y cu sigur mester wordo respeta pa bienestar di henter e pueblo di Aruba.

DVG lo a sinta siman pasa cu e tres casnan funeral aki na Aruba, esta Aurora, Ad Patres y Olive Tree.
Asina a splicanan ariba e Protocol estricto di entiero den temporada di Covid. E protocolnan implementa ta basa riba puntonan di salida di World Health Organization y RIVM.

E comunicado di diaranson lo mester ta duidelijk pa tur famia di fayecidonan, pero di otro banda NO ta cumpliendo estrictamente cu tur e medidanan implementa pa e Crisis Team januari ultimo.

Por ehempel, diadomingo marduga na Palm Beach riba 28 di februari den careda di 12’or y 45.

Manera nos a trece dilanti caba, den un apartamento pabou di Citgo Palm Beach tawata tin molester di musica masha duro mes y esaki durante Toque de Queda.

Un cantidad di patruya di diferente districto mester e sali bin yuda nan coleganan di Noord, debi cu esnan paden di e apartamento no tawata kier coopera cu polis y no kier a habri e porta pa polis.

Despues di un monton di papiamento y gritamento, poco poco tur hende a sali, a subi nan autonan y a bay di e sitio, manera nada no a pasa.

Locual nos kier ilustra cu e momento ey no a boet ningun persona, no a controla ningun hende cu mester a bay stuur auto, pa sa si nan tawata bou influencia y ni si e papelnan di auto ta na ordo, a pidi dos dogcatcher pa spanta balente, paso tur dos a bay bek warda di polis bashi.

Un grupo grandi di hende por a core ariba caya e momento ey durante Toque de Queda, supuestamente nan lo mester ta bayendo nan cas, con sigur polis sa cu nan a bay nan cas di berdad, of a bay otro fiesta mas clandestino.
Tin algun di e personanan aki tawata nan so den auto y otro auto tawata yen di hende, cu tur e consecuecianan cu esaki lo por a trece cu ne, mirando cu e hendenan aki probablemente di hopi ora lo tawata consumiendo alcohol caba.

Unda e Lik op Stuk cu na januari a pone asina hopi enfasis riba dje a keda den e casonan aki? Constantemente den e parkeerplaats tegenover di TALK OF THE TOWN ta yen, cu autonan bahul habri, cu grupo di hende para pafo di nan cu musica duro, tur esaki despues di 7’or di anochi, mientras a wordo bisa cu ta prohibi pa haci esaki.

Berdad autoridad diasabra anochi a pasa dilanti algun establecimiento y a haci algun cos etc etc, pero no a actua cu man duro. Nos no ta scuchando nada oficial di partimento di boet, mayoria biaha ta djis core cu e hendenan y no ta aplica Lik op stuk. E motibo no ta conoci, si pa ley e ta hustifica of ta mucho papierwerk, pesey nan no ta parti boet asina lihe. Di otro banda ora bo core sin seatbelt, of bo no a pone señal na rotonde, bo no a paga bo nummerplaat na ora, pa esey si mesora bo ta wordo sanciona.

Mientras tanto cu no actua cu man duro y haci e controlnan severo, cosnan cu no ta permiti ta keda pasa bou nanishi di autoridad, manera e fiesta clandestinonan di tur weekend y fiestamento keto bay riba parkeerplaatsnan despues di 7’or di anochi.

No por sigui midi cu dos midi, actua di un banda so y pa e otro banda ta djis cera wowo y laganan keda plama e virus.

Crisis team ta papiando di varios variante di Covid-19 descubri na Aruba y ainda no conoce tur e aspecto di e variantenan aki, pa e motibo aki ta keda pidi pa e pueblo cuida, bisti mondkapje, encurashando hende pa tuma e vacuna.

Den luna di Februari a fayece riba 10 persona di Covid y awo riba di 4 dia di maart ya tin 2 pa 3 persona cu a fayece di Covid. Cuanto morto mas mester cay pa pone e lik op stuk funciona? Den temporada di carnaval faya bo haya, ta manda relato oficial cu tur e detencionnan y e motibonan, awo cu ta algo mas serio y peligroso, no tin cifra?

Mientras no cuminsa parti boet pisa y bira mas streng, e organisadonan di fiestanan clandestino y tur esnan cu ta bay fiesta ta keda burla di autoridad y tristo pa bisa di Crisisteam tambe, paso nan ta djis bandona e sitio manera nada un pasa, ken sa bay sigui fiesta na un otro cas of su siguiente weekend ta bolbe organisa un otro fiesta y esaki te ora polis yega. Weekend tawata tin un fiesta ilegal cu polis a yega na e porta di e cas y a djis duna ordo pa paga e musica, pero no a mira niun hende bandona e cas ey.

Bishitantenan y e organisadonan di e fiesta ta cuminsa cu nan fiesta prome cu Tdq y ta uza e excusa cu durante Tdq, nan no por bay cas paso nan no por ta riba caminda, cu esaki lo ta dunanan supuestamente e derecho di sigui fiesta te 5’or di mainta.

Enbes di a boet tur e personanan cu a sali for di fiesta diadomingo marduga, subi auto bou influencia y tabata riba caya durante Toque de Queda, boet e organisadonan,a escohe pa bira cara y laga tur bay. Mientras aki ta caminda cu Husticia lo por a genera basta placa door duna tur e 30 pa 50 hendenan aki boet y alabes lo a siñanan respeta reglanan di crisisteam.

SI compara tur e fiestamentonan aki cu comienso di e Pandemia, a detene un cantidad di persona te hasta un señora cu a bay benta poco awa pafo di su cas, a detene adictonan ambulante, a detene varios persona dilanti di nan cas, pero diadomingo marduga, e personanan cu tabata fiestando, causando molester na bisiñanan na Palm Beach, tur a haya un free ride.

Doñonan di Rumshopnan ta preocupa, paso nan ta perdiendo placa pa motibo cu bou ningun circumstancia nan ta wordo permiti pa habri, pero pa fiesta clandestino  SI ta sigui tapa wowo.

Autoridad mester cuminsa actua y boet e bishitantenan di fiesta paso e grupo di hende aki ta fiestando sin tene cuenta cu nos ta den un Pandemia, sin tene cuenta cu Covid-19 y tur e variantenan cu tin actualmente riba nos isla, cu por contagia personanan di alto riesgo cu tur e consecuencianan cu e ta trece cu ne. Februari a cera cu mas di 10 morto, cual sigur ta hopi y actualmente tin como 10 persona cu Covid luchando pa nan bida na Hospital den Intesive Care Unit.

Kiko mas mester pasa pa autoridad cuminsa actua cu man duro riba e party peoplenan y e organisadonan di parties?