Home » Rudy Richardson (MEP): “UN PAIS SIN SU BANDERA, SIN SU HIMNO, TA UN PAIS SIN DESTINO”

Rudy Richardson (MEP): “UN PAIS SIN SU BANDERA, SIN SU HIMNO, TA UN PAIS SIN DESTINO”

by Admin
0 comment 62 views

Como candidato politico pa eleccion di parlamento na September 24 venidero, den directiva di Movimiento Electoral di Pueblo como secretario di Inclusion y Integracion ta sumamente importante pa nos tur hisa nos bandera nacional riba nos dia di Himno y Bandera, 18 di Maart venidero. Historia y cultura ta un yabi pa desaroyo sostenibel di un pais. Ultimo añanan nos a mira tendencia peligroso pa cambia historia di nos pais, specialmente pa cu e lucha pa nos Status Aparte.

Gobierno di Movimiento Electoral di Pueblo (MEP) lo institui un Comision Nacional cu amplio representacion pa publica e historia real riba base cientifico, cu lo wordo incorpora den curiculo na nos scolnan. Tur pais desaroya y mayoria pais cu tin turismo como un di su pilarnan principal di economia, tin un plan nacional di cultura bon stipula. Aruba tambe tin su plan nacional di cultura desde 2006 caba, yama ‘integraal cultuurbeleidsplan’. MEP lo sigui implementa nos plan nacional di cultura manera tabata e caso te cu 2009. Promove actividadnan cultural den tur skina di Aruba pa conscientisa nos pueblo cu nos cultura y identidad ta primordial, pa nos kere den nos mes y pa nos por sigui progresa como ser humano. Tene cuenta cu nos comunidad multicultural y duna oportunidad pa cera conoci tambe cu e cultura di e diferente paisnan cu representacion na Aruba.

Nos mester involvi henter nos comunidad multicultural, pa participacion di hoben y adulto den proceso di cultura, sin importa nacionalidad y duna instancianan cu tin e tarea y responsabilidad pa desaroyo di cultura, un sosten financiero relevante, pa yuda implementa e maneho cultural di Aruba. Instala un Conseho di Cultura cu mester revisa implementacion di e maneho cultural y duna feedback na Ministro di Cultura, Departamento di Cultura y directiva di organisacionnan gubernamental y no-gubernamental. Un participacion amplio di tur districto di Aruba ta esencial. Ora exclui un porcentahe di nos digno pueblo esaki ta trece sentimentonan anti-patriotico y no necesariamente progresivo.

Stimula instancianan cultural (e.o. museonan, parke nacional etc.) artista y artesanonan pa alcansa un producto cultural-turistico a base di Identidad propio y cu un calidad di produccion na nivel internacional. Planea y ehecuta mas investigacion riba tereno di cultura pa por mehora calidad y e producto cultural. Duna atencion na e Dianan Internacional riba tereno di Cultura y Naturalesa y pone mas enfasis na nos fiestanan cultural nacional, cuminsando na scol. Introduci na e centronan di bario, un sistema di actividadnan cultural cu guia special pa hoben, tambe pa tin espacio pa artistanan cu experencia y expertonan local, regional y internacional traha cu hobennan den proyectonan despues di scol, manera e proyectonan Arte di Palabra y Gang di Arte. Garantisa continuacion di iniciativanan particular, por ehempel Festival di Dande, Festival di Himno y Bandera, Fiesta di San Juan Dera Gay etc. “Nos yiunan, e generacionnan cu ta bay sigui y yiunan di nos yiunan lo ta bay ser orguyoso di e pueblo aki. Lague ta un klompi di diamanta. Y nos ta bay pidi nos yiunan desde awe den nos hogar, kere den bo bandera, canta bo himno, conserva bo patria ARUBA.” Betico Croes

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio