Home Dutch Kingdom Minister Besaril a ricibi ganadora di “Heel Holland Bakt” Elizabeth Lopez

Minister Besaril a ricibi ganadora di “Heel Holland Bakt” Elizabeth Lopez

SHARE

Den Haag – Minister Plenipotenciario Guillfred Besaril a ricibi na Arubahuis awe 3 di maart Elizabeth Lopez cu di 14 di februari ultimo a gana e curazon di Hulanda ora ela sali como ganadora di e programa hopi popular na television Hulandes cu ta “Heel Holland Bakt”.
Minister Besaril a felicita Elizabeth cu e logro aki y cu Aruba ta sumamente orguyoso di Elizabeth. Pa e motibo aki minister Besaril a invita Elizabeth pa e traha un bolo special pa e celebracion di Arubadag Virtual Edition cu ta tuma lugar dia 28 di maart benidero. Elizabeth a bisa di ta honra cu e peticion y cu sigur elo bin cu un creacion unico pa simbolisa 35 aña di nos Status Aparte y nos simbolonan nacional.

Elizabeth a conta cu amigonan a duna su nomber na e programa y despues di a pasa door di diferente seleccion ela logra yega den e parti final di “Heel Holland Bakt”. Na tur ocacion Elizabeth tabata menciona cu e ta bin di Aruba y con orguyoso e ta di ta Arubiano.

Elizabeth ta enfermera, pero den un entrevista cu Omroep Max – cu ta transmiti e programa “Heel Holland Bakt” – e ta bisa cu e ta gusta traha bolo. E tin su mes negoshi di bolo cu tin e nomber Mi Dushi Cakes.
Como aprecio pa e invitacion, Elizabeth a regala minister Besari un bolo pa e staf y personal di Arubahuis. E mandatario a keda masha contento cu e regalo aki y a duna Elizabeth un boket di flor y tambe un bunita buki cu potret di Aruba como gratitud pa e promocion positivo pa Aruba cu Elizabeth a duna como ganadora di e programa “Heel Holland Bakt”.