Home Local UNOCA ta duna oportunidad pa haci peticion pa proyectonan relaciona cu e...

UNOCA ta duna oportunidad pa haci peticion pa proyectonan relaciona cu e celebracion di 35 aña di nos Status Aparte y 45 aña di nos Himno y Bandera

SHARE

Cultura ta un di medionan cu mas ta bin dilanti durante celebracion di 18 di maart, pesey, pa UNOCA ta importante pa enfoca mas cu usual riba e nificacion esencial di nos simbolonan: Nos himno, nos bandera, nos escudo, nos idioma y nos moneda.

Aña 2021, ta marca sigur un aña special pa Aruba, mirando cu nos ta celebrando 35 aña di nos Status Aparte y 45 aña di nos Himno y nos Bandera. Sinembargo e aña aki, mescos cu aña pasa, nos ta bibando temporadanan dificil di un pandemia cu ta haci imposibel pa nos por celebra nos dia nacional, manera nos ta custumbra. E celebracion e aña aki, lo mester wordo haci den un forma adapta.

Posibilidad pa haci peticion pa proyecto
Den e cuadro aki, UNOCA ta habri e posibilidad pa personanan of organisacionnan por haci peticion relaciona cu e festividad nacional aki, cu a bira un custumber importante pa nos pueblo di Aruba. UNOCA como fundacion pa desaroyo cultural, ta haya necesario pa Aruba usa e dia nacional como momento di reflexion riba e momentonan di crisis financiero, economico, politico y di nos salubridad cu nos ta bibando aden, den combinacion cu e aspectonan di nos simbolonan nacional y e gran logro di nos Status Aparte.

Celebracion Nacional y importancia di nos simbolonan nacional

Proyectonan cu lo haya priodidad, ta proyectonan cu ta enfoca riba nos simbolonan nacional. Kico ta historia di nos simbolonan nacional? Kico nan ta representa y kico ta nan diferente metanan? Con e simbolonan aki ta caracterisa e pueblo Arubano y e Arubiano? Con nos simbolonan nacional por duna guia y sostene nos pais pa pasa den temponan dificil manera e pandemia cu nos ta bibando aden awor y kico nos por siña di nos simbolonan den e situacion actual? Con nos simbolonan nacional por yuda nos lanta atrobe y traha pa un mihor futuro? Con nos simbolonan nacional por yuda nos fortifica y promove nos conosemento di nos historia, amor pa nos patria y deseo pa progreso individual y colectivo? Con nos simbolonan por yuda nos fortalece nos sentido di union social y nos dedicacion na un desaroyo holistico y inclusivo riba tereno di desaroyo social, economico, educativo, cultural, medio ambiental, gubernamental, cuido medico, etc.?

Fondonan Limita

Pa UNOCA, mescos cu tur otro fundacionnan subsidia pa gobierno, tambe ta conta un reduccion den subsidio pa aña 2020. Esaki ta nifica cu UNOCA tambe mester corta gasto y bin cu reglanan mas estricto pa co-financiamento di proyecto. Pa e proyectonan aki, ta conta un suma maximo cu UNOCA por co-financia di Afl.

10.000,=. Tur otro rekisito pa aplicacion di UNOCA ta keda valido. Por haya esakinan riba nos website: https://unoca.aw/info-on-application/