Bloemond – Diadomingo merdia den careda di 12:45 p.m polis a wordo informa di un accidente di trafico dilanti Bloemond supermarket y cu tin hende herida.
Na yegada di polis nan a haya dos auto cu basta daño material.
Tawata trata di un Kia Rio y un Hyundai i10.
Falta di preferencia a hunga e rol principal den e accidente aki, momento e dama chauffeur di e Kia Rio a bay lora pa subi parkeerplaats di e supermarket.
Aki e la declara na polis cu e no a mira e Hyundai i10 biniendo di pabou. Ariba caminda por mira cu e i10 a lastra un brake tratando di evita un boksmento, pero tawata envano.
E impacto a laga ambos dama chauffeur herida, unda cu mester a pidi ambulance.
Na prome instante a pidi un ambulance pero despues mester a pidi un mas, debi cu e chauffeur di e Kia Rio tambe a cuminsa sinti’e malo e tawata keha di dolor di cabes fuerte.
Ta hopi accidente a yega di sosode na e mesun sitio aki, debi cu algun chauffeur ta concentra solamente pa bay parkeer na e supermarket y no ta pone atencion ariba trafico contrario.
