ORANJESTAD – Awe mainta via video conference Hues di Corte den Promer Instancia a dicta sentencia den e caso penal cu Ministerio Publico a cuminsa contra e homber G., kende a wordo haya culpable di a abusa di dos mucha menor di edad.
Aruba Native por a compronde cu 5 Februari 2021 e tratamento di e caso a tuma lugar caminda Fiscal a remarca cu e comportacion di sospechoso no ta mustra autentico. El a mustra cu G. ta sera su boca te cu awor den Corte y ta admiti solamente loke for di e documentonan lo por prueba. Fiscal a bisa cu mester tene cuenta cu gran parti di periodo, G. tabata menor di edad o sea bao 18 aña. Tambe G. mes tabata victima di inmoralidad. Tambe Fiscal a tene cuenta cu psycologo a bisa cu G. ta menos responsabel pa su actonan. Fiscal a exigi 30 luna di prison di cual 10 luna ta condicional cu un tempo di prueba di 3 aña.
Awe mainta Hues a bisa cu G. ta culpable. Hues a tene cuenta cu e raport di psycologo cu G. tin autisimo limita. E ta haya G. menos responsabel pa su actonan. Psycologo ta recomenda guia di Reclasering.
Hues tambe a tene cuenta cu G. a haci un parti di e actonan aki, tempo cu G. mes tabata menor di edad. Psycologo ta haya cu G. ta actua manera mucha. Hues a bisa cu e ta usa e ley di castigo di mucha y a condena G. na 12 luna di prison di cual 5 luna ta condicional cu un tempo di prueba di 2 aña y bou guia di Reclasering. Esey ta nifica cu G. lo mester keda 7 luna sera den KIA.