Desde 2019 e prome training anual di ‘Signs of Safety’ a cuminsa na Aruba como parti di e ehecucion di Plan di Crisis Social den colaboracion cu CEDE Aruba, pa profesionalnan cu ta traha riba tereno social y tambe den area di enseñansa, husticia y salubridad. E training a wordo desaroya na Australia y a wordo implementa na Estados Unidos, Europa y Asia cu bon resultado riba e tereno di proteccion di mucha, particularmente den caso di abuso.
E siman aki Stichting Reclassering en Jeugdbescherming Aruba tambe a cuminsa cu tres dia di training intensivo. E organisacion a opta pa sigi e metodo di ‘Signs of Success’, cual ta un training equivalente na ‘Signs of Safety’, sinembargo, ta cuadra mas cu e audiencia specifico cu Stichting Reclassering en Jeugdbescherming ta atende cu ne.
E team di Stichting Reclassering en Jeugdbescherming ta experenciando e training di ‘Signs of Success’ den forma exitoso, no obstante e hecho cu nan mester sigi e curso completamente online. Desde cu e protocolnan di distanciamento relata na COVID a wordo implementa na Maart 2020, Stichting Reclassering en Jeugdbescherming a busca y aplica varios tools digital y inovativo, pa sigi cumpli cu nan responsabilidadnan pa cu nan trabow y nos comunidad en general.
Pa medio di diferente proyecto, Stichting Reclassering en Jeugdbescherming Aruba ta traha pa re-enforsa tanto adulto y hoben cu a haya nan mes den problema cu husticia, pa nan por reintegra den nos comunidad positivamente y hiba un bida stabiel, cu menos chens riba re-incidencia.
Stichting Reclassering en Jeugdbescherming Aruba lo keda enrikese y stimula e conocemento di nan team, pa asina continuamente mehora e tecnicanan cu nan ta uza den nan trabow diario. E organisacion ta satisfecho di por participa na e training sumamente importante aki y pa asina forma parti di e red di departamento y profesionalnan cu tur ta boga y colabora pa un miho clima social na Aruba.