ORANJESTAD – Awe merdia Hof di Corte Superior a tuma decision riba e peticion di abogadonan mr. Sulvaran y mr. Illes di Paul Croes.
Aruba Native por a compronde cu Hof a dicidi cu ta bay scucha testigonan cu abogadonan di Paul Croes, mr. Sulvaran y mr. Illes a pidi. Luna pasa Paul Croes hunto cu cinco persona a presenta den Corte Superior pa e caso “regiezitting”, caminda un realidad no tabatin tratamento di e caso.
E “regiezitting” mas bien tabata un reunion entre e tres Huesnan di Corte Superior, cu ta forma Hof, e abogadonan y Procurador General, caminda e abogadonan por expresa si nan kier mas investigacion tuma lugar. Den e caso aki, e abogadonan di Paul Croes, mr. Sulvaran y mr. Illes a haci un serie di peticionnan por escrito cu tanto Hof como Procurador General a haya copia di esaki.
Procurador General (PG) a bisa Hof cu e kier reacciona riba e promer peticion di mr. Sulvaran y mr. Illes pa scucha un trahador na KIA. PG a bisa cu e ta rechaza e peticion aki. Na opinion di PG, e no ta haya cu tabatin violacion di derechonan di Paul Croes. Segun PG, tabatin limitacionnan pa Paul Croes den KIA pero e no ta haya cu a viola reglanan di Derecho Humano.
Awe merdia, Hof, via video conference, a tuma decision riba e peticionnan di abogadonan mr. Sulvaran y mr. Illes. Hof a dicidi cu ta honra practicamente tur e peticionnan di e abogadonan. A dicidi cu ta bay scucha e director di KIA, director di DIMAS y un trahador di KIA. Tur cos ta mustra cu e aña aki, tratamento di e caso Paul Croes den Corte Superior ta tuma lugar.
