Home Local Dia 26 di februari proximo ta e fecha final pa entrega e...

Dia 26 di februari proximo ta e fecha final pa entrega e formulario di declaracion di inkomstenbelasting 2019

SHARE

 

 

ORANJESTAD Departamento di Impuesto ta participa cu e fecha final pa entrega e formulario di declaracion  di inkomstenbelasting 2019 ta dia 26 di febuari 2021.  

Manera conoci, Departamento di Impuesto a otorga e formulario menciona dia 1 di september 2020 na tur  contribuyente cu ta registra pa inkomstenbelasting. E termino legal pa entrega e declaracion tawata 2 luna.  Sinembargo Departamento di Impuesto a duna 3 luna mas di tempo; pues en total e contribuyentenan a haya 5 luna di tempo pa completa e declaracion di inkomstenbelasting y entrega esaki.  

Entrega e declaracion 

Pa entrega e declaracion mester acudi na e oficina principal na Camacuri y pasa na e balie di recepcion. E  contribuyentenan cu ta entrega mas cu 3 formulario mester haci un cita via www.impuesto.aw. Riba e pagina  principal di e website ta scoge “Afspraak maken” y despues ta scoge “Indienen aangifte inkomstenbelasting  en/of winstbelasting” pa haci e cita online.  

Ta recomendabel pa trece copia di e formulario na momento di entrega esun original.  

Obligacion legal 

Yena y entrega e formulario di declaracion ta un obligacion legal. Ademas pa medio di e declaracion, e  contribuyente ta haya e oportunidad pa declara loke realmente el a ricibi na entrada durante aña 2019. Alabes e  ta haci uzo di su derecho di deduci su gastonan. 

Evita boet 

Door di yena y entrega e formulario na tempo, e contribuyente ta evita cu e ta haya un aanmaning y  posiblemente un cobransa (taxativo) cu boet. E boet ta 5% di e suma di impuesto cu minimo di Afl. 250 y  maximo Afl. 10.000. Cumpliendo na tempo, e contribuyente por evita e sancion aki.  

Gerencia di Departamento di Impuesto 

21 di februari 2021