Procurador-general di Aruba Bote ter Steege a reuni recientemente cu barioteam Noord di Cuerpo Policial di Aruba y cu bureau Slachtofferhulp. Tambe presente na e encuentro aki tabata señora Seferina (beleidsmedewerker di Polis) y coordinador di Veiligheidshuis señora Schulte. E barioteam Noord ta consisti di señores Meijerhof, Croes y Goeloe y señora Loefstop. Bureau Slachtofferhulp a keda representa pa señora Rodriguez. Tanto polis como bureau Slachtofferhulp ta forma parti di Veiligheidshuis Aruba.
E intencion di e encuentro tabata pa pone barioteam Noord y bureau Slachtofferhulp den spotlight y gradici nan pa nan dedicacion extraordinario y nan envolvimento. Veiligheidshuis ta topa hopi reto y pesey ta importante pa menciona tambe e exitonan.
E procurador-general a bisa cu e como ex-polis sa bon bon cu e trabao di polis ta encera mas cu solamente traha proces-verbal. Pa soluciona situacionnan indesea den un vecindario of pa logra stop violencia den cas of molester den bario, polis tin cu haci hopi biaha mucho mas cu loke nan tin custumber di haci semper. Barioteam Noord ta consisti di agentenan policial cu ta traha cu alma y curpa. E equipo a enfatiza e bon comunicacion entre e coleganan di e team, caminda nan ta steuns riba otro pa por sigui cu animo.
Un di e prioridadnan di e procurador-general ta e trato di victima. Victimanan tin cu biba pa resto di nan bida cu e recuerdo di loke a pasa nan. Tuma tempo pa scucha e victima ta forma parti di cuido pa e victima. Bureau Slachtofferhulp ta hunga un rol crucial den esaki y ta un di e instancianan cu mas ta aporta casonan na Veiligheidshuis.
Veiligheidshuis ta un cooperacion entre partnernan di e cadena penal y e cadena di cuido. Meta ta pa traha hunto na seguridad di Aruba dor di preveni y baha recidive, molester y criminalidad, dor di enfrenta conhuntamente problemanan complica. E partnernan di Veiligheidshuis ta: Ministerio Publico, Cuerpo Policial di Aruba, Departamento di Asuntonan Social, Voogdrijraad, Reclassering, KIA, Bureau Slachtofferhulp, Bureau Sostenemi, Fundacion Guia Mi, FMAA (Fundacion pa Maneho di Adiccion), Respaldo, Wit Gele Kruis, Sociaal Psychiatrische Dienst, FCCA y Bureau Leerplicht.
Banda di e partnernan fiho, tin e partnernan flexible manera (por ehempel), Orthopedagogisch Centrum, Fundacion Hende Muher den Dificultad y Schoolmaatschappelijk werk.