ORANJESTAD, 19 februari 2021. Segun resumen di awe 44 persona a recupera, a registra un total di 46 caso nobo di Covid-19, di cual 14 ta no-residente. E cifra di no-residente positivo ta ensera esnan no-residente cu ta test na aeropuerto na nan yegada y na laboratorionan prome cu nan bandona Aruba. E cantidad total di testnan ehecuta ayera na e diferente localidadnan na Aruba, entre otro laboratorio di hospital, laboratorionan priva y aeropuerto ta 1079 test. ‘Postivity rate’ entre nos residentenan ta 13%.
Casonan activo pa awe ta 286, cantidad di fayecido relaciona cu Covid-19 a aumenta na 71, condolencia na famia di e fayecido.
Hospital ta informa cu tin un total di 8 persona interna di cual 4 ta den Cuido Intensivo y 4 riba unidad general di covid. Edad promedio di esnan ingresa pa extra cuido ta 63 aña.
Campaña di vacunacion National contra COVID-19 a inisia y ta vacunando dunadornan di cuido como e prome grupo. Den e prome 2 dianan a vacuna caba un total di 390 persona.