Santa Cruz – Diaranson atardi laat polis a bay Santana di Santa Cruz, unda un dama lo ta wardando.
Motibo tawata cu restonan di un defunto a desaparece.
Polis manera debe ser a yega e Santana y a topa cu e señora.
Eynan esnan concerni cu e Santana tambe tawata tey y splica loke a pasa. Pues no tawata manera e señora a pensa, esta cu nan a horta “curpa” di un ser stima.
Na e sitio nos a wordo splica kiko a sosode.
Ta asina cu diasabra awor lo tin entiero di un familiar di e señora aki y manera custumber diaranson mainta lo a saca restonan di un famia y pa asina por traha luga pa esun di diasabra.
E restonan cu a wordo saca ta wesonan y esaki a wordo poni den un saco y laga atras un “bodega” di e graf, segun esnan encarga cu e Santana.
Diaranson atardi ora cu e dama a yega na luga den Santana e ta ripara cu e restonan di e ser keri no tawata tey mas y esaki a pone bati alarma mesora.
Na final e persona cu ta encarga cu e Santana a splicanan cu durante dia otro famia lo a yega y a bay cu e wesonan unda nan lo wordo crema door di un mortuario.
Lo ta trata di un of otro problema di famia unda cu no tin comunicacion cu otro y ta pasa tipo di casonan manera esaki.
Polis a tuma dato y a continua nan caminda, no ta conoci si e acto aki lo por conduci na mas problema den e famia.
