California Lighthouse cera pa publico

Despues di cinco aña cu a restaura e faro di California completamente, Stichting Monumentenfonds Aruba (SMFA) lo inicia e luna aki cu trabounan di mantencion.

Entrante 16 di februari te cu principio di april e faro di Hudishibana lo ta cera pa publico.

Projexon Group, cual ta e contratista cu a gana e destaho publico cu a tuma lugar aña pasa, lo ta trahando durante e periodo aki riba e mantencion di e faro. Principalmente parti paden lo haci reparacion na e pleister di e murayanan, verf e murayanan, repara e trapi di palo y e bentananan. E cambio mas grandi lo ta e instalacion di un cabuya como ‘trapleuning’ pa asina no solamente haci e subimento di e lighthouse mas sigur pero tambe pa evita cu mester mishi na e murayanan parti paden.

Pa locual ta trata e pleister di calki cu lo mester aplica, lo tin un experto di Merca for di e compania Limeworks pa guia y duna e indicacion di e metodo di aplicacion di e producto. Asina por garantiza cu esaki ta tuma lugar di e forma corecto.  Den e caso aki ta sumamente importante pa uza e material original cual ta e kalki, esaki no solamente lo ta mas duradero pero asina lo por yuda tambe cu baha e gastonan di e mantecion. SMFA lo documenta tambe e proceso di e aplicacion di e kalki.

Debi na e ubicacion di e faro y tambe cu for di su restauracion e faro ta habri pa publico ta pone cu e ta deteriora mas liher y pa e motibo aki a dicidi di haci e debido mantencion. SMFA tin un meerjarenonderhoudsplan pa su monumentonan cual ta indica e trabounan necesario tur aña pa cada monumento pa asina  garantisa cu nos edificionan ta keda den un bon estado.

For di awor SMFA ta gradeci Experitours y publico en general pa e comprencion y cooperacion pa e periodo cu e faro lo ta cera.