Y na tur rubiano y amigonan afor por haci e aporte di 5 pounds y lesa tocante mi 9 proyectonan completo via Gofundme na: https://gofund.me/6d2a052b
‘E poder di amor’ of ‘The Power of Love’ ta un proyecto cu ta consisti di 9 campaña di sensibilisacion basa den documentarionan corto cu ta trahando simultaneamente riba nan.
Paula Nahr, ta un Emprendedor Social Creativo y tambe fundador di Switch Foundation, y e ta e persona tras di e proyecto aki cu el a parti den 2 categoria (e poder di creatividad) y (un comunidad mas consciente riba e impacto di abuso infantil y muchanan cu necesidadnan special).
Ta trata tambe di campañanan cu ta beneficia Aruba tambe internacionalmente relaciona cu diferente topico manera activismo, e situacion di e venezolanonan, entre otro.
Pa Aruba, kier concentra riba campañanan di concientisacion pa yuda compronde, duna guia na e muchanan cu necesidadnan special y nan mayornan.
Ta bay ta exponiendo testimonionan di exito di mayornan cu tin muchanan cu necesidad special manera autismo, ‘Sindrome di Down’, muchanan cu un IQ halto cu ta siña mas slow, ADHD, etc.
Nahr a splica cu e muchanan aki mester desaroya y sigui evoluciona locual ta hopi importante pa un pais. “Si un ser humano no ta desaroya e ta bira un carga y un gasto economico. Como logica, nos tin cu yuda pusha e ciudadanonan aki bay dilanti pa un dia nan no tin cu ta dependiente di gobierno of ta un carga pa e famia, cu no por bay dilanti pasobra nan tin un hende cu no ta independiente pasobra e no a desaroya su abilidadnan”.
Pa por logra esaki e aspecto mas importante pa por compronde e personanan aki ta door di scucha, informa y investiga, Paula Nahr a remarca.
El a bisa cu e ta realisando un investigacion cu ya caba el a cuminsa. E investigacion aki e ta bay pone riba video pa asina tur hende tin acceso na dje. E ta bay ta un campaña di concientisacion, pero tambe videonan investigativo di capacitacion.
Pa medio di e videonan aki tur hende ta bay tin acceso gratis. Trahadornan social, profesionalnan, scolnan, NGO’s, biblioteca, entre otro.
Tin testimonionan hopi poderoso di algun mayor cu ta conta nan situacion y con nan a haya ayudo y guia. Tur e consehonan aki ta bay wordo poni riba videonan pa asina mayornan, educadornan y comunidad henter por compronde mihor e mayornan y e muchanan special y mas importante cu tur cos, kico por haci pa yuda, Nahr a indica.
Ta bay tin tambe entrevistanan cu representantenan di scolnan y organisacionnan cu ta experto riba e tema y e desaroyo di e muchanan aki. Nan tambe por tuma contacto libremente cu Paula Nahr pa medio di e email y telefon cu ta wordo suministra den e articulo aki.
Di e 9 campañanan, aworaki ta bezig cu e documentarionan pa yuda desaroya e industria creativo y con importante ta pa aworaki mas cu nunca siña e ciudadanonan con pa stimula y activa creatividad cual tin como meta resolve problemanan.
E prome campaña ta bay wordo lansa dialuna 22 di Februari, 9 pm na Telearuba. Henter Aruba lo haya e oportunidad di wak e storianan di 9 creativo y con nan a haci durante Covid-19 pa sigui y con nan a soluciona nan situacion pa por a sigui bay dilanti.
Esaki ta bay duna tips na e muchanan, hobennan, na mayornan, comunidad henter riba con nan por cuminsa sali di e miedo, di nan area di confort y haci cosnan nobo pa mehora nan situacion financiero, Nahr a duna di conoce.
Mientrastanto, e investigacion pa e campaña di concientisacion pa loke ta e muchanan cu necesidadnan special ta sigui.
Pa logra esaki Paula Nahr tin mester di recolecta fondonan. E tin e meta di yega na e suma di 25 mil florin cual ta cubri un parti basico di e gastonan di produccion. E trabao aki ta encera conocimento, experticio, ta rekeri tempo, como tambe tecnologia.
E campañanan di concientisacion aki lo wordo lanza riba e rednan social (Instagram y Facebook di Paula Nahr y Switch Foundation), hunto cu e documentarionan cu lo pasa na Telearuba como tambe e canal di Youtube di Paula Nahr.
Con por yuda Paula Nahr duna voz na esnan mas vulnerabel y e e creativonan impulsa pa e poder di e amor cu ta utilisa arte pa mehora mundo? Esaki ta simpel:
Ta pidi cada persona na Aruba pa haci un donacion di Afl. 5. Tambe companianan por invita nan empleadonan pa contribui cu e Afl. 5. Tambe, ta invita companianan pa participa cu publicidad of como partnernan. Por tuma contacto cu Paula Nahr via WhatsApp na: +297 594-5133 of [email protected]
Duna bo aporte di Afl. 5 na:
Caribbean Mercantile Bank
Switch Foundation (KVK 1200)
Acc. # 615 84 004