ORANJESTAD – Awe mainta Corte di Husticia a trata e caso penal cu Ministerio Publico a cuminsa contra e homber G., autista, kende ta wordo acusa di entre 2011 y 2019 a viola su dos rumannan muher di crianza.
Aruba Native por a compronde cu e tratamento di e caso tabata hopi tristo. Den sala di Corte tabata presente e mama y tata di e dos muchanan. E mama di e sospechoso tambe tabata presente. E mama di e muchanan victima tabata blo yora.
Durante tratamento di e caso a sali na cla cu G. a declara cu den pasado 2 biaha el a wordo molestia.
Hues a mustra cu G. nunca kier a duna declaracion na Polis y ariba conseho di abogado el a haci uso di su derecho di silencio. Awe G. a bisa Hues cu awor si e ta contesta preguntanan cu Hues, Fiscal y abogado haci. Hues a puntra si su padastro a puntr’e si a mishi cu un mucha. El a admiti. El a haci esaki, dilanti su mama, mama di e muchanan y e padastro, kende ta tata di e muchanan tambe. E mama di e muchanan a dal’e un biaha y e tata a dal’e mas biaha.
Hues a mustra cu un di e muchanan, esun di 10 aña, a bisa na Polis, cu tempo cu e tabatin 9 aña, G. tabata mishi cun’e. E no tabata gusta y G. a bis’e cu e no mester bisa ningun hende. E mucha a splica con G. tabata tene relacion cun’e diferente biaha. Segun G. no ta asina. Segun G. e solamente tabata usa su dede y e tempo ey e tabatin 17 aña. Segun G. e momento ey e tabata curioso y no tabata sa cu loke e tabata haci tabata malo.
E mucha a conta su otro ruman kico G. a haci y e otro ruman a bisa cu esey a sosode cun’e tambe. G. a desmenti esey. Hues a bisa cu e otro mucha tambe a bisa cu diferente biaha G. tabata tene relacion sexual cun’e y cu e ultimo biaha tabata ora cu G. tabatin 18 aña. E mucha tabatin 14 aña e tempo ey y el a bisa G. pa stop y G. tabata bis’e pa keda keto. G. a desmenti esey tambe.
Fiscal a bisa cu pa cu e castigo, mester tene cuenta cu e periodo largo caminda segun e muchanan cu esaki tabata sosode regularmente. E hecho cu e muchanan ta mustra cu nan no kier y G. ta sigui tog, esey ta haci e caso mas serio. Esaki tabata sosode den e cas caminda e muchanan mester por sinti nan mes sigur. Esey ta haci cu Fiscal ta haya cu mester exigi castigo halto. Sinembargo mester tene cuenta cu gran parti di periodo, G. tabata menor di edad o sea bao 18 aña. Tambe mester tene cuenta cu G. mes tabata victima di inmoralidad. Tambe Fiscal a tene cuenta cu psycologo a bisa cu G. no ta responsabel pa su actonan.
Fiscal a exigi 30 luna di prison di cual 10 luna ta condicional cu un tempo di prueba di 3 aña.