Diamars atardi Prome Minister Evelyn Wever-Croes tawata den Parlamento pa duna informacion tocante e acuerdo firma cu Hulanda e siman aki. Prome Minister a elabora ampliamente riba e Agenda di ehecucion y na final el a laga un bunita mensahe pa pueblo di Aruba: Cu respet, madures y dedicacion nos lo logra surpasa e retonan aki y transforma nos pais
Proceso di uitvoeringsagenda:
E uitvoeringsagenda (agenda di ehecucion) ta e resultado di un proceso intensivo durante cua pais Aruba y Hulanda a yega na un acuerdo pa sosten di likides a base di e Landspakket firma 13 di november 2020. Despues di e periodo aki tanto Hulanda como Aruba a apunta un asina yama ‘Tijdelijke Werkorganisatie’ (TWO) pa fungi como procesbewaker y pa percura cu e trabounan preliminario tuma luga den bon forma.
Di banda di Aruba por indica cu a apunta asina yama ‘trekker’ cu ta profesional den sector publico cu expertisio specifico relaciona cu e tema di e Landspakket. Asina TWO-AUA, profesional local y e ministernan ta forma e ecosistema di maneho di e Landspakket pa Aruba.
Por indica cu e intencion ta pa cada kwartaal crea un agenda di ehecucion cu ta sigui e agenda di ehecucion anterior den forma coherente y cronologico. Pa asina tin un acercamento integral
E prome agenda di ehecucion aki tabata resultado di varios sesion intensivo cu varios experto y profesional di diferente sector durante e prome luna di e aña aki.
Adicionalmente, por bisa, cu banda di e plan di ehecucion aki ya caba Pais Aruba a cumpli cu varios palabracion haci, hasta prome cu e dealine stipula.
E agenda di ehecucion ta un documento dinamico cual e version aki, a keda oficialisa durante reunion cu secretario di estado señor Knops, dialuna pasa. Tabata un proceso encamina conhuntamente, durante cua e ekipo di ambos pais a delibera estrechamente cu otro.
E agenda di ehecucion ta rekeri esfuerso maximo di tur esnan involvi mirando cu hopi biaha Aruba no tin e capacidad extenso di personal ni recurso cu Hulanda tin. Varios biaha ta e mesun profesionalnan ta encarga cu diferente tarea importante. E punto aki nos ta, y lo keda enfatisa cerca Hulanda.
MINISTERIO DI ASUNTONAN GENERAL:
Pa locual ta e ministerionan cu ta cay bou di Prome Minister, e mandatario principal di nos pais a indica cu sigur tin trabou grandi pa haci. Asina, tin algun tarea clave stipula pa e.o. DRH relaciona cu condicion di trabou y transforma e sistema di HR di gobierno den uno adecuado pa futuro. Aki lo enfoca e.o. tanto riba prestacion y motivacion di empleado, condicion di trabou, como eficiencia den e sistema. Asina, ta baha gasto como tambe crea un aparato resiliente. Esencial den esaki tambe ta e tema di digitalisacion. Pa locual ta e aspecto aki, ya Pais Aruba a tuma paso grandi den forma di E-government.
Esencial den e trayectonan menciona ta cu e agenda di ehecucion ta e prome paso pa trata e diferente temanan. Asina lo haci analisis y tene consulta necesario prome cu por yega na tuma decision balansa. Aruba semper lo keda enfatisa esaki. Si ta asina cu e palabracionnan haci ta serio y solamente cu madures, union y esfuerso nos por logra.
Algun di e prome fechanan relevante pa cu trabounan cu tin cu tuma luga ta:
- entrega plan di accion pa analisa sistema di HR di sector publico y asina bin cu mehoracion di esaki 5 di februari 2021 (B8)
- entrega plan di accion pa analisa condicion di trabou pa medio di experto externo sosteni door di experto interno den sector publico y semi publico 1 di maart 2021 (B5)
- Crea un plan di accion 15 di maart 2021 pa un analisis di eficiencia organisatorio di aparato gubernamental (B4)
- Analisa prestacion di personal actual di sector publico 1 di mei 2021 (B6)
MASTERPLAN REPOSICIONANDO RUMBO DI NOS PAIS
E landspakket ta toca varios tema cu lo por conduci na un Aruba resiliente door di stimula cierto desaroyo y baha gasto. Sinembargo tin algun tema cardinal pa nos pais cu ta rekeri mas elaboracion. Esaki ta por ehempel; stimula un desaroyo economico nobo, medio ambiente y laga nos no lubida e realidad di cambio di clima.
E temanan aki si ta wordo trata mas elaboradamente den e Master Plan Resposicionando e Rumbo di nos Pais, cu ta e plan na cua mas di 250 profesional di sector publico y priva a traha. Pa e motibo aki a haci esfuerso pa alinea e dos plan y trayectonan aki pa asina Aruba por percura pa yega na un miho resultado pa nos Isla.
“Mi kier enfatisa cu e periodo nos dilanti no ta bay ta facil y sigur lo tin hopi reto, sinembargo cu respet, madures y dedicacion nos lo logra surpasa e retonan aki y transforma nos pais”, Prome Minister a finalisa bisando den su disertacion den reunion den Parlamento.