Gobierno di Aruba y Hulanda a firma un areglo pa ehecucion di e asina yama Landspakket (Agenda di Ehecucion), den cual ta prescribi accionan y trabounan cu pais Aruba mester ehecuta y e tempo cu esakinan lo tuma.
Cu e ratificacion di e areglo aki a habri caminda pa, den un cuadro di tempo hopi amplio, realisa tur e restructuracionnan y inversionnan cu a keda pacta. Tur e trabounan aki mester contribui na e economia y comunidad di Aruba.
Nos economia mester keda fortifica y wordo amplia, cu miras na ta mas resiliente y duradero den su crecemento. Di e manera aki nos pais lo sigui crece den capacidad y cu mehoracion di e poder adkisitivo.
Cu un bon gobernacion cu ta pone como enfasis e solidez di nos finanzas publico y coherencia social, nos por sigura cu lo tin un contribucion firme na e crecemento aki tambe. Di e manera aki nos por realisa e importancia cu e restructuracion di nos economia y comunidad tin pa asina nos Pais por ta resistente na crisisnan den futuro.
Den cuadro di e agenda di ehecucion acorda cu Hulanda, Ministerio di Transporte, Comunicacion y Sector Primario a delinea e siguiente tareanan;
- Basando nos mes riba investigacionnan actual y adicional (den conhunto cu paisnan den Reino), lo percura pa reforsa nos sistema di trafico aereo. Esaki por encera coperacion di organisacionnan y organisa procesonan/proceduranan di trabou uniforme, conforme e exigencianan di siguridad internacional, cu mester desemboca den mas eficiencia y rebaho di gastonan.
- Mester conduci investigacionnan pa logra yega na sistemanan y procesonan di evaluacion pa crea coperacionnan prometedor. Ta existi un deadline, cual ta dia 1 di juli 2021, y despues a base di e evaluacionnan aki lo determina e siguiente desicionnan.
- Conseheronan di Ministerio di Transporte, Comunicaciony Sector Primario a reuni caba cu representantenan di Hulanda na Aruba, como tambe esnan envolvi na Hulanda.
- A base di e palabracionnan menciona, a reuni cu tur stakeholders den trafico aereo, manera Servicio Meteorologico, departamento di Aviacion Civil, AAA NV y ANSA N.V.
- Cada un di e stakeholders envolvi a sumininstra nan puntonan di importancia y relevancia, pa asina cumpli cabalmente cu e agenda di ehecucion. Ta bon pa menciona tambe cu den e mundo di aviacion ya caba tin diferente protocolnan di coperacion.
- Lo percura pa finalisa e documento pronto y entrega esaki na individualnan y organisacionnan concerni.
Areanan di cooperacion
- Ehecucion di supervision conhunto.
- Fortifica e protocolnan di cooperacion.
- Desaroyo di un legislacion concordante pa aviacion civil den Reino Caribense.
- Pa medio di innovacion y coperacion, haci e transporte aereo den Reino Caribense mas duradero confiabel.
- Mehoracion di conectividad, como cu ta di sumo importancia pa tin coneccion aereo confiabel y duradero.
- Intercambio di recurso humano, projecto y inversionnan cu lo impulse e sectornan di mas relevancia.