Home » Homber cu plantacion di marihuana dilanti Hues

Homber cu plantacion di marihuana dilanti Hues

by Admin
0 comment 64 views

 

ORANJESTAD – Awe mainta den sala di Corte, e homber K.P. a para riba cu e plantacion di marihuana cu e tabatin na su cas, tabata pa e traha remedi pa su tanta cu ta sufri di cancer. Apesar cu su abogado mr. Emerencia ta haya cu e forma di investiga di Polis no tabata corecto, Hues si ta haya cu e investigacion tabata bon y a confirma e exigencia di Fiscal.

Aruba Native por a compronde cu Fiscal a bisa Hues cu e homber K.P. ta wordo acusa cu entre Augustus 2020 y 9 October 2020, tabatin plantacion di matanan di marihuana. Den Corte, K.P. a admiti na Hues cu el a hacie.

Hues a mustra cu Polis a haya un plantacion cu ta consisti 7 mata, 18 stek y 6 mata chikito. En total 2.5 gram di marihuana a keda confisca. K.P. a reclama na Hues, di con Polis a haci investigacion. Hues a splica cu a base di tip cu Polis a haya cu K.P. lo tin un arma di candela y ta bende droga, Polis a bay haci investigacion.

Hues a mustra cu na September 2019 caba, K.P. tabata deteni pa 20 mata. Segun K.P. e ta traha remedi di marihuana pa su tanta cu ta sufri di cancer. K.P. a bisa Hues cu su tanta ta haya cantidad di pilder for di diferente dokter pero ningun ta calma e dolor. Segun K.P., ta e marihuana cu e ta traha den remedi, ta e unico cos cu ta calma e dolor un poco pa su tanta.

Hues a remarca cu K.P. a wordo avisa caba na September 2019 cu no por tin plantacion pero K.P. a bolbe haci’e y ta bisa cu e ta haci’e pa yuda su tanta.

Fiscal a bisa cu e ta haya legalmente proba cu K.P. tabatin plantacion di marihuana. Fiscal a bisa Hues cu no ta a base di tip anonimo sino ta for di un informante di Polis a haya informacion. Fiscal a sigui bisa cu a base di e informacion, Hues Comisario a duna permiso y tabata presente ora di e investigacion. Fiscal ta haya cu no por papia aki di investigacion ilegal. K.P. mes a admiti cu e tabata planta. E ta haya cu tin suficiente prueba. Na opinion di Fiscal, e hecho cu K.P. ta bisa cu e ta traha medicina di marihuana, no ta hustifica loke el a haci. K.P. ya a wordo avisa pa no planta marihuana den e caso anterior pero mas o menos 1 aña despues, atrobe e tin plantacion. Fiscal a exigi 34 dia di prison di cual 30 dia ta condicional y un tempo di prueba di 2 aña. Fiscal a bisa Hues cu e castigo ta pa pone presion riba K.P. stop di planta.

Abogado mr. Emerencia a remarca cu e no a haya documentonan cu ta mustra cu Polis a haya orden di Hues Comisario pa scucha combersacion y haci investigacionnan. El a conclui cu no tin investigacionnan legal a tuma lugar. E abogado a remarca cu no tin rapport di investigacion cu Polis a haci promer cu a bay na e cas. Abogado ta haya cu tin violacion di un bon proceso di investigacion y esey ta trece cun’e cu mester declara Fiscal no admisibel.

Hues a dicta sentencia di biaha y a bisa cu e no ta haya cu tabatin violacion di un bon proceso di investigacion. El a bisa cu ta a base di informacion cu K.P. tabatin arma y bala y plantacion, a bay haci investigacion. Hues a mustra cu K.P. mes a admiti di ta usa pa propio uso y famia. Hues a bisa cu e ta haya e exigencia di Fiscal na su lugar. Hues a condena K.P. na 34 dia di prison di cual 30 dia ta condicional y un tempo di prueba di 2 aña.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio