ORANJESTAD – Awe Corte di Husticia di Aruba, a dicta sentencia den e caso sumario cu señor Otmar Oduber, doño di BCY Entertainment V.B.A., a cuminsa contra Aruba Bank N.V. E caso ta relaciona cu e hecho cu Aruba Bank N.V. a nenga di habri un cuenta bancario pa e compania BCY Entertainment (BCY).
Aruba Native por a compronde cu e decision final di Hues den e caso ta, cu Hues no ta haya husto cu Aruba Bank N.V. ta mustra cu door cu tin un investigacion penal contra señor Oduber, no kier habri un cuenta pa no duna e banco mal reputacion. Hues ta haya cu segun e estado di derecho di Aruba, un persona ta keda inocente, tanten cu e no a wordo condena pa loke ta sospecha e persona di dje.
Hues den su evaluacion ta mustra cu banconan na Aruba, entre nan Aruba Bank, tin un funcion importante pa cu comercio na Aruba pa asina companianan por haci uso di mercado local y internacional. Esey ta nifica cu un compania ta haci uso di un cuenta bancario. Esaki tambe ta conta pa BCY. For di e reglanan di banco relaciona cu e ley contra labamento di placa, por compronde cu ta investiga un compania cu kier habri cuenta. Aruba Bank a bisa cu e tin e libertad di sera un cuenta bancario di BCY. Hues ta mustra cu en principio esey ta corecto, semper si Aruba Bank tin motibonan di peso obhetivo y hustifica.
Hues ta mustra cu Aruba Bank ta mustra cu door di e miedo cu e banco lo por haya mal reputacion door cu Oduber ta sospechoso den un investigacion penal andando relaciona cu supuesto fraude y corupcion durante su periodo di minister, a dicidi cu no ta habri un cuenta bancario pa BCY.
Na opinion di Hues, esaki no ta motibo di peso hustifica pa nenga pa nenga di habri un cuenta pa BCY. Hues a mustra cu den e estado di derecho di Aruba, te ainda ta conta, cu un persona ta inocente tanten cu den Corte e sospechoso no a wordo condena. E sospechoso Oduber durante tratamento di e caso a desmenti di tin algo di haci pa loke e ta wordo sospecha di dje.
Na opinion di Hues, e hecho cu Oduber na Aruba ta un prominente politico, no ta haci diferencia. E hecho cu e banco ta mustra riba daña su reputacion, Hues ta haya cu mester wak promer si Oduber lo wordo condena pa loke e ta wordo sospecha di dje. E pregunta ta su esaki lo bay sosode.
Hues ta ordena Aruba Bank N.V., pa tanten cu den un caso mas profundo no tin un otro decision, dentro di 24 ora habri un cuenta bancario pa BCY y mantene esaki habri bao di e condicionnan normal. Esaki bou di e comprendimento cu si Oduber, wordo condena door di un Hues den un caso penal pa loke e ta wordo sospecha di dje, Aruba Bank N.V. tin e autoridad pa caba cu e relacion cu BCY, teniendo cuenta cu un periodo di 2 luna. Hues a stipula un daño per juicio di 2500 florin pa cada dia cu Aruba Bank keda sin cumpli cu e sentencia, te un maximo di 500.000 florin. Aruba Bank N.V. tambe ta wordo condena pa cubri e gastonan di e caso y abogado na bandi di BCY.