Den medionan di comunicacion UPP a tuma nota cu e Comision Permanente di Infrastructura y Medio Ambiente di Parlamento a haci un bishita di trabou na Parkietenbos pa mira e desaroyo encuanto e incinerator chikito. E compra di un instalacion cu ta pata pata di corupcion y “gesjoemel” di parti di ex-minister Otmar, cu por cierto por a conta riba un apoyo total di particularmente parlamentario Howell, i sosteni 100% pa e coalicion y e gabinete Eveline Croes! Y pa colmo e ta un di e actornan principal y “handlanger” den e actonan ilegal cu a tuma lugar den Parlamento pa core cu un Minister, cu tabata treciendo claridad den e corupcion aki y probablemente hopi mas. Bay tin curashi!
Ora cu UPP a kere cu Howel lo a haya “screment” di e tipo di cosnan aki, ata awor eta purba di “dek” e corupcion aki tambe sin niun tipo di remordimento.
Howell a duna di conoce cu a haci hopi pregunta. Ta interesante pa sa, si a puntra director Marlon Croes kico ta su rol den henter e asunto obscuro aki. Ta presion O.O. a pone riba dje pa ela colabora pa e corupcion aki por a tuma lugar?
Un di e motibonan cu no por a ni test ta pasó NO tabata tin un “hindervergunning”pa motibo cu e.o. no tabata tin un “sprinkle-system”! A puntra director di DOW cuanto extra mester a paga pa p.e. e “sprinklers” pa e incenirator aki? A puntré si tabata tin destaho publico pa esaki?
Howell ta bisa cu awor si tin “hindervergunning”. Pero segun UPP tin comprendi cu esaki ningun dia no a wordo publica. Es mas con a para cu e habitantenan di Parkietenbos, cu a pone nan “bezwaar”? Nan a wordo scucha caba den e caso aki?
Serlimar no a participa den e destaho! Sinembargo e amo Otmar a trece Serlimar di carambola aden pa opera e planta aki! Esaki pa purba hustifica e previlegiamento di su sponsor! Serlimar lo bai opera esaki of a duna e mesun sponsor di O.O. un contract di 5 aña cu btw lo bay costa miyones? Esaki no ta e mesun compania cu a participa den henter e “sjoemelmento” hunto O.O? Y awor como recompensa e compania aki mes ta wordo previlegia y pa colmo atrobe sin ningun tipo di destaho? Esaki lo bay costa pueblo por lo menos 16 miyon florin sin conta e “sprinklers” y sin conta e edificio cu ya caba t’ey!! Conforme e “bestek” mester a bin un edificio apart. Pero pa previlegia e sponsor te hasta a desmantela e planta di Bouldin & Lawson pa traha lugar pa pone e incinerator chikito.
Si tene cuenta cu tur e aspectonan aki, e ora ey e compania pariba di brug a “bid” por lo menos 5 miyon florin MENOS. Howell a puntra riba e aspecto aki? Esaki ta integro?
Si Howell a lesa e documentonan cu UPP a entrega na Parlamento na februari 2020, elo por a saca afor cu e incenirator chikito ey NO tin e capacidad pa por cumpli cu e cantidad di medical waste, cadaver y e sludge!! Den caso di un “break-down” kico lo pasa cu e medical waste, e cadavernan y e cantidad grandi di “sludge”? E compania amigo/sponsor NO tin un “redundancy-plan”!
Pa Howell su informacion e compania pariba di brug si tin un “redundancy-plan”, esey kiermeen cu ora cu un situacion asina presenta, e plan aki lo percura pa resolve esaki. Ta obvo cu ora cu resulta loke UPP ta bin ta pronostica for di awor cu e incenirator chikito lo no tin a capacidad pa atende cu tur desperdicio, anto e ora nos lo bay tende e mesun “kakofoni”y cantaleta? Atrobe lo bay bisa cu ta influencia politico?
A puntra director di DOW cuanto e previlegiamento di e sponsor lo bai costa extra? Pa e empleadonan publico NO tin, pero pa “SPONSOR” si tin? For di e documentonan ariba menciona Howell por saca afor tambe cu e gastonan pa fuel lo ta haltisimo. Of aki atrobe lo bay bisa cu ta lo bay usa LNG? Djis como informacion, Howell tabata sa cu e compania di pariba di brug, cu Howell a laga cay manera un patia berde y a laga O.O masacra nan, SI lo a opera e planta cu nan a ofrece, riba gas!
Pues meneer Howell, NO ta e influencia politico a causa cu e incinerator chikito ainda no ta traha, pero ta e CORUPCION di dia cla di O.O, cu por cierto cu sosten incondicional di Howell, ta e UNICO causa cu e incenirator ainda no ta funcionando.
Pa colmo Howell ta haci como sifuera cu na maart venidero ora cu e planta aki cuminsa funciona, e problema di desperdicio na Aruba lo ta soluciona. Atrobe otro manipulacion! Tin biaha ta mihor un hende keda keto pa pueblo no solamente haya sa con ignorante bo por ta, pero den e caso aki con “corupcion-complaciente” bo ta!
Un hende mester tin hopi berguensa y curashi pa purba di defende tanto PORkeria asina!! Ta e mesun Howell cu a permiti pa su amo O.O bagatalisa y masacra un compania local y pa colmo di pariba di brug! Unda Howell su voz a keda pa defende e compania aki y denuncia y para e corupcion aki y dicon no a defende e compania aki? E contesta ta hopi obvio, su amo O.O. a duna e ordo pa keda keto! Ta p’esey mester caba cu tipo di gobernacion asina. Y tur esaki cu apoyo y sosten di nos Prome Ministro cu awor ta responsabel pa esaki y ta haci su mes culpabel na tipo di previlegiamento y mal gobernacion! UPP ta ofrece e REBOOT 2.0 cu lo caba cu e tipo di gobernacion asina pa percura pa un “MANECE NOBO PA ARUBA”!