San Nicolas- For di comienso di Covid-19, aña pasa e centro di San Nicolas unda e barnan ta y caminda e negoshi di prostitucion ta tuma luga, a cuminsa bira hopi keto y por bisa a muri. E barnan tabata e prome negoshinan cu a cera nan portanan, mientras patras di e bar, den e cayanan Rembrandstraat y Jan Steenstraat e negoshi di prostitucion a keda draai.
Asina mes e prostitutanan a keda pa basta luna ta sigui eherce nan trabou. Despues a bin e segundo ola di Covid-19 y aki por cuminsa nota cu e negoshi di prostitucion cu tabata tin den e dos cayanan aki, a mane para. nos no sa si nan a cuminsa haci nan trabou na un forma diferente, of simpelmente a bandona nos isla, despues cu a habri fronteranan.
Nos a scucha for di hendenan cu ta traha den turismo, cu tin un negoshi di prostitucion riba un otro nivel, den forma di callgirl, via cierto taxista cu lo ta fix prostituta pa turistanan, tambe cu e prostitutanan sa bay den Casino of hotel etc. pa busca cliente. E formanan mas discreto aki ta wordo haci na otro paisnan tambe y segun nos a compronde cu ta di hopi tempo tin e tipo di prostitucion aki na Aruba.
Den e lunanan di november, december pariba den e cayanan tabata hopi keto, por a mira un prostituta, cu tabata traha, pero tur e otro cambernan tabata cera na candal, te hasta e porta di hero tabata cera. Solamente den e casnan den Jan Steenstraat, por a mira damanan sinta den un sala y ora auto pasa,nan ta ofrece nan mes cu e tradicional saludo.
Recientemente a cuminsa mira poco poco mas actividad den e negoshi di prostitucion, den e cayanan Rembrandstraat cu Jan Steenstraat. Maske ainda e barnan ta cera, por a mira algun dama para den e portanan di e cambernan den e cayanan aki, ofreciendo nan mes na clientenan. Mientras Aruba ta conta cu 406 persona contagia cu Covid-19, e trabou di prostitucion ta sigui, e damanan aki y nan clientenan ta willing pa tuma tur riesgo di wordo contagia cu Covid-19 y su consecuencianan, pa poco placa y e otro banda pa un rato di placer.
