“Encontra e Betico den nos p’asina enfrenta e retonan actual cu determinacion, perseverancia y den union”
Na ocacion di e Ceremonia Protocolar di Dia di Betico na Plaza Gilberto Francois “Betico” Croes, Prome Minister Evelyn Wever-Croes a duna un discurso conmovedor encurashando henter pueblo di Aruba pa den e tempo dificil cu nos ta pasando aden debi na Covid, pa cada un enfrenta e retonan actual cu determinacion, perseverancia y den union.
“Awe nos ta celebra e fecha natalicio di Gilberto François “Betico” Croes, cu si e tabata na bida, e lo a cumpli 83 aña. Sinembargo nos bon Dios tabata tin otro plan cu Betico y el a bay nos dilanti na edad di 48 aña.
Riba e dia aki nos ta para keto na e bida y e lucha di Betico Croes, cu danki na su determinacion, perseverancia y danki na e sosten di un pueblo uni, a logra cosnan grandi pa Aruba; a logra cu awe nos ta biba den un pais autonomo den Reino yama Aruba.
Y e aña aki nos ta celebrando 35 aña di Status Aparte. Ta danki na nos Status Aparte nos por a desaroya nos pais den un di e paisnan lider den nos region, y ta danki na e lucha cu Betico a lidera, otro pueblonan a wordo inspira pa lucha pa nan autonomia tambe.
Un persona cu den un bida corto, a laga un legado grandi, tipifica pa su determinacion, perseverancia y lucha pa union.
KEN TA BETICO?
Betico tabata un tata di 4 yiu, un esposo, yiu, ruman, y e tabata mi omo y mi padrino di bautismo. E persona cu un carisma enorme, semper cu atencion pa tur hende, mescos cu ta su mesun yiu. Betico mes a bisa den un di su discursonan cu nos ta considera un di su discursonan di despedida den Ser’i Noka, cu e no ta un tata di un hogar di mama, tata y 4 yiu, sino un tata particular, di henter Aruba. Y esey e yiunan di Aruba cu a conoce tambe a sinti.
Como politico Betico Croes a demostra con ta lidera cu curason, poniendo e pueblo, e ser humano na prome luga. Con ta lidera cu respet pa otro, dunando respet y exigiendo respet.
El a mustra nos cu mester duna espacio na hende muhenan den politica, pasobra mas participacion di hende muhe den politica y den puestonan importante den gobiernonan ta trece un miho balance den toma di decisionnan cu ta concerni nos tur, homber y muhe.
El a mustra nos con, pa bo logra bo meta, bo mester tin biaha dal algun paso chikito atras, pa despues bo sali cu pasonan grandi padilanti. El a siña nos e importancia y e balor di stima nos pais, y nos simbolonan di libertad, nos himno y nos bandera.
Betico a mustra nos e importancia di union, pasobra un pueblo uni hamas lo ser venci. Union entre famianan, union entre oponentenan politico, union entre esnan cu a nace aki, y esnan cu no a nace aki. E mes a bisa, Arubiano no ta esnan cu a nace aki so, sino tambe esnan cu a haci di Aruba nan hogar.
Awor ta na cada un di nos pa sigui cu e principio y e balornan cu Betico Croes a mustra nos, y cu a conduci na logronan grandi pa nos pais.
LUCHA PA STATUS APARTE
Betico Croes no a cuminsa cu e lucha pa Status Aparte di nos pais. Politiconan grandi prome cu su tempo ya a cuminsa expresa e deseo di nos pueblo di ta baas den nos mesun cas. Sinembargo e lucha cu a cuminsa den añanan 40, a wordo bandona, y ta Betico den añanan 70 a gara e bandera di e lucha ey, y a hib’e te na su final.
El a haya e fundeshi di e lucha construi, pero debi na abandono e fundeshi tabata den mal condicion. El a fortifica e fundeshi, el a lanta e murayanan, el a percura pa e dak y asina a construi e pais Aruba cu awe nos ta biba aden. El a entrega nos e yabi di un Pais autonomo, pero lamentablemente e mes no a biba pa por a experienci’e, ni goza di dje. Nos tin e privilegio di biba den e pais autonomo, pa nos lanta nos yiunan den e libertad aki.
KICO BETICO LO A HACI?
Den e ultimo tempo nos pais y nos autonomia tabata bou presion. Y durante e temponan aki varios biaha mi tabata pensa, kico Betico Croes lo a haci, si e tabata den e posicion aki. Ki decision e lo a tuma. Con e lo a atende cu e situacion. E tambe lo a scoge pa acepta e ayudo di Hulanda, bou condicionnan, contal cu nos pais no kibra?
Mi no tin contesta riba e preguntanan aki, pero un cos si mi sa. Betico Croes lo ta hopi orguyoso di su pueblo, e pueblo cu e a sa di uni den un solo ideal: haci di Aruba un pais, y cu awor ta uni pa saca nos pais di e abismo cu e pandemia Covid a hinca nos aden.
Orguyoso di nos frontliners cu ta haciendo un trabou grandi den cuido di nos pashentnan y nos grandinan, y den mantene orden publico.
Orguyoso di nos ciudadanonan cu boluntariamente ta saca man pa yuda otronan, trahando un te di moringa of un sopi pa nan bisiña y conocir. Orguyoso di e trahadonan, cu boluntariamente a entrega parti di nan entrada pa yuda otronan cu a perde nan entrada a consecuencia di e pandemia. Orguyoso di tur e boluntarionan cu ta yuda esnan mas vulnerable di nos pais. Mescos cu mi, mi ta sigur cu e tambe lo ta hopi orguyoso di tur esaki.
Covid a dal nos duro, pero mi tin tur confiansa cu nos lo enfrenta y surpasa e reto aki tambe. Sigur inspira pa e lucha pa Status Aparte di nos pais cu Betico Croes a realisa, e biaha aki tambe, nos tin e mesun determinacion, y perseverancia y uni den amor pa nos pais, pa lanta, gara e bandera y sigui cu e lucha. Talves nos tin cu dal algun paso chikito atras, pa despues sali dilanti cu pasonan grandi, pa un economia mas fuerte, cu un autonomia mas fuerte, pa un Aruba mas fuerte.
Y nos a yega di pasa den esaki caba. Prome cu nos a drenta nos Status Aparte dia 1 di januari 1986 Lago a cera su porta. Cu esaki e tempo ey gobierno a perde gran parti di su entrada, mescos cu awor. E tempo ey nos a wordo inspira pa Betico, cu determinacion, perseverancia y union, nos a enfrenta e retonan y surpasa nan. Mescos nos lo haci awor. E unico diferencia ta cu Betico Croes no ta fisicamente cu nos mas awor.
ENCONTRA E BETICO DEN BO
Sinembargo nos cada un tin un Betico den nos. P’esey awor, den e retonan grandi aki cu nos pais ta aden, y cu nos cada un ta enfrenta den nos hogar, nos cada un mester busca pa encontra e Betico den nos. Busca e balornan, principionan cu Betico a siña nos, cu el a mustra nos. Pa asina enfrenta e retonan actual cu determinacion, perseverancia y den union. Lucha pa bo soñonan. Nunca rindi. Si bo soño ta bo destino, no ta importa cuanto obstaculo crusa bo caminda, nos bon Dios ta yuda bo logr’e. Mi tin tur confiansa cu nos lo ta exitoso e biaha aki tambe.
DANKI
Mi kier finalisa cu palabranan di agradecimento. Na prome luga na colega Minister Xiomara Maduro y Comision Celebracion Dianan Nacional cu pa di 4 aña ta organisa e dia nacional aki hopi bunita y significativo. Danki colega.
Mi kier gradici tambe tur esnan cu a lucha hunto cu Betico, y henter nos comunidad cu awe ainda tin un cariño grandi pa Betico. Danki pa sigui mantene su memoria bibo memey di nos.
Mi kier gradici tambe su famia, tur esnan cu a sacrifica pa Betico Croes por a dedica su bida na e lucha pa nos Status Aparte. Especialmente su yiunan Guisette, Glenbert, Junior, Glendeline. Awe indudablemente boso lo kier a lanta y dun’e un serenata pa su cumpleaños. Y apesar cu nada por yena e bashi cu el a laga, sa cu henter nos pueblo ta sumamente agradecido na cada un di boso pa e sacrificio cu boso a haci, y ohala cu e cariño y respet cu nos pueblo tin pa boso tata Betico, por duna boso poco consuelo e dia aki.
Pa varios aña caba, mi ta bishita scolnan prome cu Dia di Betico, pa admira con nan ta preparando pa e dia aki. Semper mi ta haya sorpresanan agradabel con nos maestronan y alumnonan ta esforsa nan mes pa celebra e dia aki. E aña aki, lamentablemente door di e protocolnan di Covid, mi no por a bishita scolnan, pero mi ta contento di mira cu scolnan a prepara cu entusiasmo. Y mi ta corda dos aña pasa, durante mi bishita na Scol Paso pa Futuro, un alumno a puntrami : si Betico lo tabata na bida, kico ami lo kier bis’e?
Si Betico lo tabata na bida lo mi kier bise DANKI.
DANKI pa duna nos un pais autonomo pa biba den dje, pa lanta nos yiunan den libertad y
DANKI pa siña y mustra nos kico tur nos mester haci pa mantene e libertad aki.
Ohala cu e dia aki por inspira cada un di nos pa por enfrenta e retonan den nos bida, y con pa surpasa nan. Y cu determinacion, perseverancia y den union.
Cu Dios bendiciona nos dushi pais Aruba”.
