Home Local Graduacion Dorainne Danies pa Bachelor of Arts den Organization, Governance, and...

Graduacion Dorainne Danies pa Bachelor of Arts den Organization, Governance, and Management

SHARE

13 di Januari Dorainne Danies a defende su tesis exitosamente riba plataforma di Zoom pa e comision di graduacion cu tabata consisti di dr. Mieke de Droog, Yolanda Richardson M.Sc y mr. Kathy Paskel-Ruiz, director di DIMAS. Dorainne ta e di tres candidato cu haci su presentacion final via Zoom.

Dorainne a cuminsa Organization, Governance, and Management (OGM) na 2016, ela haci un intercambio na Universidad di Utrecht na 2019 y e mesun aña ela haci su pasantia na WEB Aruba. E titulo di e tesis ta: “Enhancing Quality of Service in the Public Sector in Aruba: Needed 21st Century Skills and Training of Civil Servants”. Dorianne den su tesis a investiga cua habilidad sector publico ta rekeri di su empleadonan, cua habilidadnan e empleadonan ta domina y cua habilidadnan nan mester mehora pa cumpli cu e demanda di e clientenan. Tambe e graduado a investiga con e tres preguntanan aki ta relata cu e habilidad pa duna un bon calidad di servicio y ehecuta y facilita e proyecto pa introduci un sector publico cu procesonan electronico esta ‘E-Governance’. Den e resumen di e tesis a bin dilanti cu e empleadonan ta haya cu nan ta domina diferente habilidad, pero nan mes ta indica cu nan mester entrenamento riba diferente tereno. Un ehempel ta comunicacion interno y externo. Otro ehempel cu a bin dilanti ta cu en berdad e habilidad cu ta rekeri pa un empleado publico por ehecuta nan trabao y tarea ta caracterisa como e habilidadnan di siglo 21 (21st Century Skills). E habilidadnan aki cu mas ta rekeri segun esnan entrevista ta entre otro inteligencia emocional, e habilidad di coordina cu otro persona y e habilidad di soluciona problema compleho. Esaki ta algun di e habilidadnan cu ta necesario pa maneha retonan y facilita oportunidadnan.

Dorainne a entrevista 14 participante tanto na CENSO como na DIMAS pasobra e dos organisacionnan aki ta duna servicio directo na e pueblo di Aruba diariamente y ya nan a cuminsa cu e proyecto pa digitalisa e sector publico (E-Governance). Nan por sirbi como ehempel pa identifica ki entrenamento ta necesario pa mehora servicio den e era nobo y un servicio digitalisa y mas agilisa.

Dorainne ta e di 46 graduado cu a prepara su mes como un profesional den e area di ciencia di organisacion (organisatiewetenschappen) y administracion publico. Dorainne su deseo y plan ta pa sigui pa un Masters den futuro. Pa awor e ta bay goza di un vacacion cortico y sondea cua programa riba nivel di Master e ta bay pe.

Universidad di Aruba, particularmente e departamento di ‘Organization, Governance, and Management’, ta felicita Dorainne cu e logro aki.

Pa mas informacion tocante OGM, bishita e pagina di Universidad di Aruba na http://www.ua.aw/OGM y e pagina di Facebook @UniversityofArubaOGM.