Gobernador di Aruba, Su Excelencia Alfonso Boekhoudt, riba dialuna 25 di januari a asisti na e ceremonia protocolar en conexion cu Dia di Betico. Minister di Finansa, Asunto Economico y Cultura, Xiomara Maduro, a ricibi Gobernador Boekhoudt na Plaza Libertador G.F. Betico Croes.
Despues cu a canta e himno nacional, Pastoor Toti Fuentebella a haci oracion y Señor Tai Kong Trimon a recita un poema. Como parti di e programa, tradicionalmente ta pone krans di flor na e monumento di Betico Croes. Pa motibo di e medidanan vigente contra corona, e aña aki a pone e flornan adelanta. Presidente di Parlamento Señor Ady Thijsen a hiba palabra den nomber di Parlamento di Aruba, sigui pa un speech di Prome Minister Evelyn Wever-Croes. Clausurando, e hobennan Jordan Koolman y Javinah Besselink a canta e cantica ‘Lant’e’, acompaña pa e pianista Danny Koolman.
