Home Local Crisis Team – 55 Caso nobo, 480 activo

Crisis Team – 55 Caso nobo, 480 activo

SHARE

ORANJESTAD, 23 januari 2021. Segun resumen di awe 74 persona a recupera, a registra un total di 55 caso nobo di Covid-19, di cual 53 ta residente y 2 no-residente.

Cantidad total di testnan ehecuta ayera na e diferente localidadnan na Aruba, entre otro laboratorio di hospital, laboratorionan priva y aeropuerto ta 587 test. ‘Positivity rate’ entre nos residentenan ta 14%.

Activo tin awe 480 caso, cantidad di fayecido relaciona cu covid-19 ta 56 persona.

Hospital ta informa cu tin un total di 25 persona interna di cual 9 ta den Cuido Intensivo y 16 riba unidad general di covid.

Analisis di e cifrasnan ta duna indicacion cu e plamamento di e virus ta disminuyendo. Por mira den e grafico adhunto cu e ‘positivity rate’ y e ‘sliding average positivity rate’ den e ultimo siman ta indicando un bahada continuo. Ta nesesario pa hunto nos sigui traha na reduci e plamamento di e virus mas hopi posibel pa e cifrasnan por sigui baha y no subi.

Den e grafico tambe por tuma nota cu e cantidad di tesnan ta relativamente hopi. Esaki ta debi cu tin mas virusnan ta circulando na Aruba cu ta afecta mescos cu covid-19 e sistema respiratorio. P’esey ta importante pa nos sigui test na indicacion di cualkier sintoma paresido na griep y no asumi cuta dies un otro virus. Pasobra sin un diagnostico sigur bo por tin covid y por ta plamando esaki.

Mirando cu e medidanan implementa ultimo ta dunando bon resultado awor no ta e momento adecuado ainda pa flexibilisa nos comportacion. Pa cual motibo tur medida ta keda vigente ainda.

Den transcurso di e proximo simannan Crisis Team lo sigui monitor e cifrasnan y si esakinan sigui baha cu cooperacion di comunidad, Crisis Team lo por cuminsa evalua e medidanan implementa pa mira unda por flexibilisa sin cu e risico di contagio of transmision di e virus ta bira mucho grandi un bez mas.