San Nicolas/ Sabana Basora: Diabierna den careda di 2’or di merdia, e restonan mortal di Lisander Leonardo Ignacio, miho conoci como Sammy tabata na Ad Patres Funeral Home caminda famia, amigonan y conocirnan a bin compaña e famia den su momentonan mas doloroso y pa despedi di Sammy.
Despues e la wordo hiba na su ultimo luga di sosiego, cu ta na Santana na Sabana Basora.
For di trempan por a nota varios patruya di polis, team di observacion, varios recherche den e area di Ad Patres y despues na momento di hiba e defunto Santana, tambe por a nota un biaha mas presencia di autoridad. Esaki tabata mas bien pa mantene orden publico, pa evita cualke situacion cu lo por a bay for di man. Tur cos a mustra cu e entiero a bay trankil, por a nota un tristesa grandi riba cara di su famia y amigonan.
E asesino ainda ta liber, ta canando rond. Mientras Sammy asina hoben, a wordo ranca di un forma cruel for di su yiu, su mama, su ruman, pareha y tur otro personanan cu a stim’e.
Nos ta convenci cu autoridad ta trahando duro pa soluciona e asesinato aki y lo por ta cuestion di un ora pa otro cu detencion lo por cay den e caso aki.
