Oranjestad – Dialuna dia 25 di januari ta celebra Dia di Betico durante cual nos ta conmemora fecha natal di Nos Libertador Gilberto François Betico Croes. Un dia cu nos mester para keto y recorda e estadista mas grandi cu Aruba a conoce y danki na su lucha awe nos ta un Pais autonomo den Reino Hulandes.
Pa motibo di e pandemia di Covid-19 y pa cumpli cu e regla y protocolnan di seguridad di Crisisteam y Departamento di Salud Publico pa asina por mantene e situacion bao control y pa evita lo bini mas casonan, no ta duna permiso pa actividadnan publico.
Minister di Finansa, Asuntonan Economico y Cultura mr. Xiomara J. Maduro ta invita pueblo di Aruba pa sintonisa via Canalnan local di television y di e forma aki ta brinda comunidad e oportunidad pa por sigui e dos eventonan aki.
Manifestacion Cultural Virtual
Diadomingo dia 24 di januari 2021 iniciando pa 8 or di anochi caminda lo tin un programa special na television y plataformanan social dedica na memoria di nos Libertador Betico Croes. Un anochi di presentacion di canto, musica y baile.
Acto Protocolar
Un invitacion tambe pa sintonisa dialuna mainta e Acto Protocolar cual lo inicia pa 9 or di mainta. E programa lo consisti cu canto di Himno Aruba Dushi Tera, discurso di Minister President, poesia y canto.
Ambos evento lo conta cu presencia limita di persona pa asina por cumpli cu e regla y protocol.
Un invitacion pa sintonisa ambos evento via Canalnan di Television y Plataformanan Social y demostra cu Aruba ta hopi agradecido na Betico y na tur cu a yude den su lucha pa nos libertad.
