Home International “Blackout challenge” a ocasiona morto di mucha na Italia

“Blackout challenge” a ocasiona morto di mucha na Italia

SHARE

 

“Blackout challenge” ta un wega cu ta pone cu muchanan ta blokia nan respiracion te ora cai flauw pa asina experimenta sensacionnan fuerte.

Un mucha muher Italiano di 10 aña a muri asfixia diaranson pasa na Palermo (Sicilia, zuid di Italia), mientras e tawata participa na un desafio viral ariba e red social TikTok.

E mucha muher, yama Antonella, a mara un faha rond di su garganta cu e obhetivo di keda sin hala rosea pa un bon rato, mientras e tawata graba e sucesido cu e camara di su celular. 

Su ruman muher di 5 aña a descubri su curpa inconsiente. Su mayornan a transporte pa e Hospital Infantil di Palermo pero e no a logra sobrebibi. 

Tur aña e asina yama “Blackout challenge” ta ocasiona accidentenan, di cual algun ta fatal. 

E mayornan a conta e corant La Repubblica cu e otro ruman muher di 9 aña a splica nan cu “Antonella tawata hungando e wega di asfixia”. 

“Nos no tawata sa nada di esaki”, e tata di e mucha a bisa. “Solamente nos tawata sa cu Antonella tawata riba TikTok pa wak video. Con por imagina un cos asina?”

“Cu mi yiu Antonella a muri pa motibo di un wega extremo di TikTok, ta algo cu mi no por accepta”, e tata, Angelo Sicomero a bisa. Hunto cu su casa ela dicidi di duna e organonan di su yiu pa otro muchanan por sigui biba. 

Ministerio Publico di Palermo a habri un investigacion encuanto un posibel provocacion di suicidio.

E celular di e mucha muher a wordo confisca pa investigadornan kendenan lo bai determina si Antonella tawata tin contacto cu otro participantenan y si un hende por a invite pa participa na e reto aki of si el a traha e video aki pa un amigo of familiar.

TikTok a saca un comunicado referente na e tragedia aki. “E seguridad di e comunidad di TikTok ta nos maximo prioridad, nos ta na disposicion di e autoridadnan competente pa colabora den cualkier investigacion”, el a bisa.