Home » 8 y 6 aña di prison exigi pa homber y muher cu a abusa di nan yiunan

8 y 6 aña di prison exigi pa homber y muher cu a abusa di nan yiunan

by Admin
0 comment 50 views

ORANJESTAD – Awe mainta Corte di Husticia a trata e caso penal cu Ministerio Publico a cuminsa contra e dama V. y e homber T., kendenan ta wordo acusa cu entre April 2019 y October 2020 a viola y abusa nan yiunan menor di edad.

Aruba Native por a compronde cu ta trata aki di e yiu muher di V., y e yiu muher y yiu homber di crianza di T. Den sala di Corte tabata presente e mama di V., kende ta e wela unda e yiunan di V. ta keda y tambe e ex señora di T., cu ta mama di e dos muchanan cu a wordo abusa.

Hues a puntra V. di e acusacionnan. V. a bisa cu nada ta berdad. Hues a bisa cu tin 3 mucha cu e cosnan a sosode. Segun V. ta su mama a pone e mucha papia e cosnan aki. Tambe e ex señora di T., tin rabia riba T. Segun V. e ta kere cu su mama kier kita su yiunan for di dje. El a bisa cu por ta e no tabatin paga suficiente na su mama. Ora el a bisa esey, e mama tabata mustra cu no ta asina. Ta asina cu e mama di V. y e ex señora di T. a haci denuncia na Juni 2019 y un luna despues V. y T. a wordo deteni.

Hues a puntra T. si e acusacionnan ta corecto. T. a bisa cu su ex casa lo a bisa su yiu pa declara contra T. pa e bay sera. Segun T. semper e mama kier pa e bay sera. Tabatin un caso den Corte caminda ta kita placanan for su salario pa mantene su yiu y e yiu di crianza.

Hues a bisa cu e yiu muher di T. a bisa cu ora e tabata wordo abusa door di T., T. a bis’e cu e ta haci esey pa e haya suerte pa su caso den Corte. Segun T., tur e cos ey ta gañamento. T. a bisa masha hopi cos contra mama di V. y su ex señora pa mustra cu ta un trampa a haci pa e bay sera. Na dado momento el a hasta lanta para pa reclama actitud di su ex casa cu ta sinta den sala di Corte. E guarda di CEA a hala su atencion y mand’e sinta di biaha.

Hues a bisa cu segun investigacion di dokter na e muchanan, ta mustra cu lo a wordo penetra. T. a bisa Hues cu si ta asina cu su yiu muher a wordo penetra, e mama lo mester bay dun’e cuenta.

Na opinion di Fiscal, casonan di abuso sexual, e parti di prueba ta hopi dificil. Esaki pasobra bo tin solamente e sospechoso y e victima. Fiscal ta haya cu den e caso aki tin suficiente pruebanan di sosten.

El a mustra cu tin declaracion di e victimanan cu ta sostene otro. Un di e victimanan tabata presente ora cu un otro tabata wordo abusa. Fiscal ta haya e declaracion di e victimanan consistente y detaya. Tambe tin declaracion di e testigonan esta e wela e ex senora di T. Di otro banda V. y T. ta desmenti categoricamente. Fiscal a bisa Hues cu e ta haya cu e declaracion di e victimanan ta confiabel. Dos di e victimanan nan declaracion ta consistente cu otro y detaya. Fiscal a menciona varios partinan di declaracion di e dos victimanan cu ta consistente y detaya. Hasta e victimanan a mira con T. lo tabata abusa di nan.

Fiscal a mustra cu T. y V. tabata papia cu e muchanan cu cada un lo mester modela separa caminda e cuarto ta wordo sera na yabi. E momento ey e abuso tabata tuma lugar. E relato di dokter ta mustra cu tin indicacion di abuso.

Pa cu e castigo, Fiscal a bisa cu e ta tene cuenta cu durante un periodo largo a viola, penetra y haci actonan inmoral di tres mucha. Esaki a sosode den un lugar cu e muchanan mester ta sinti nan mes sigur. A abusa di e confianza cu e muchanan tabatin den nan mayornan. E caso aki a causa impacto den comunidad. Fiscal ta tuma T. y V. na malo cu como tata y mama di e victimanan, envez di a proteha di e muchanan, a abusa di nan. Fiscal a mustra cu tin instancianan a lanta pa proteha muchanan victima y e ta duna nan razon. El a tene cuenta cu ta “first offender” y cu psycologo ta haya cu T. ta menos responsabel pa su actonan. Fiscal a exigi 8 aña di prison pa T. y 6 aña di prison pa V. E exigencia di Fiscal a cay manera un baño di awa frieu pa e sospechosonan. Hues a keda di studia e caso y dentro di algun siman lo por spera sentencia.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio