ORANJESTAD – Corte di Husticia a trata e caso penal cu Ministerio Publico a cuminsa contra e damanan L.d C. y Y.L.
Aruba Native por a compronde cu ambos a wordo deteni 25 September 2020 na aeropuerto, na momento cu nan kier a hiba mas cu 500 gram di cocaina Hulanda.
Ta asina cu L.d.C. ta liber mientras cu Y.L. ta sera na KIA. Nan ta wordo acusa di entre 1 Juli 2020 y 24 September 2020 a viola e ley di droga.
Dia 25 September 2020, nan a wordo deteni na aeropuerto ora cu nan a exporta mas cu 500 gram di cocaina. Hues a bisa cu Y.L. a admiti tur cos na Polis. Den sala di Corte Y.L. a reacciona ora cu Hues a mustra riba declaracion di L.d C. cu a bisa cu e tabata cumpra droga for di Y.L.
Hues a mustra cu tin combersacionnan scucha. Segun Y.L. algun dia promer cu 25 September 2020, el a haya droga pa hiba Hulanda. Segun Y.L., e combersacionnan tabata riba esey. Segun Y.L. e no a cumpra e droga pero el a percura pa e droga y tickets pa bay Hulanda y cu L.d C. voluntario a dicidi di transporta.
Segun Y.L., el a planea cu L.d C. pa nan bay biba na Hulanda. E kier a bay biba Hulanda cu su yiunan. El a desmenti categoricamente cu el a bende L.d C. cocaina.
Fiscal a bisa Hues cu e ta haya legalmente proba cu e pareha aki kier a exporta cocaina pa Hulanda. Fiscal ta considera Y.L. como un intermediador. El a exigi pa Y.L. y L.d C. 14 luna di prison di cual 4 luna ta condicional cu un tempo di prueba di 2 aña. Fiscal a exigi tambe pa Y.L. y L.d C. cay bou supervision di Reclasering.
Hues a sera tratamento di e caso y a dicta sentencia di biaha. Hues ta haya e pareha culpable di transporta droga. Hues a condena L.d C. y Y.L. na 12 luna di prison di cual 6 luna ta condicional cu un tempo di prueba di 2 aña. Hues a ordena cu durante e tempo di prueba, e pareha cay bou guia di Reclasering.