Home History of Aruba Historia di Aruba: Asesinatonan cruel na comienzo di 80 (Parti 1)

Historia di Aruba: Asesinatonan cruel na comienzo di 80 (Parti 1)

SHARE

Den aña 1980 pa 1982 a pasa algun asesinato hopi cruel cu a keda marca den historia.

E asesinatonan aki nos lo parti nan den dos parti. Esaki ta e prome parti:

Na augustus 1980, Caso tristo di Kwidama na Alto Vista
&
Na oktober 1981, Caso tristo di un yiu cu a mata su tata na Canashito

 

Durante e weekend di 1 pa 3 di Augustus 1980, Dama na estado asesina den auto y curpa di doño di auto  haya 4 kilometer mas leu.

Alto Vista: Diasabra 02 di Augustus 1980 den oranan di merdia a cuminsa circula un noticia hopi tristo rond na Aruba, “den un vehiculo pariba di kapel di Altovista, nan lo a haya un dama na estado morto, e dama a ricibi algun tiro den su cabes”


E area unda e Crimen Passional a tuma luga

Diasabra 2 di augustus 1980 den oranan di marduga pa manece mainta. Sr. Kwidama den compania di un dama Haitiana di 25 aña, lo a abandona e Snack Truck den un Jeep Blazer, sin sa cu e destinacion cu nan a escohe lo bira nan destino final.

Apartemente nan lo a bay direccion di Kapel di Alto Vista of direccion di Bushiribana, pero locual a tuma luga, un otro caminda of na costa norte pariba di Kapel di Alto Vista pa Bushiribana, nunca a keda confirma. Unda nan a pasa y kiko tur exactamente a sosode den e oranan di marduga pa den oranan di merdia, lo keda un misterio.

Dama tur na sanger morto den un Jeep
Diasabra den careda di 1’or y mey di merdia un yamada a drenta na Warda di Polis. Un homber a informa polis di un descubrimento hopi tristo.
E homber a bin topa hopi mas pariba di kapel di Alto Vista un Jeep Blazer pega den baranca y a mira un dama cu tabata mustra morto den e jeep, e dama tabata benta memey di e sientanan y tabata cubri na sanger.

Polis di Santa Cruz a wordo manda cu urgencia na e sitio. Na yegada enberdad nan a bin topa cu un Jeep Blazer cu tabata para cara pa lama y solamente algun meter leu for di lama. Den e Jeep nan a bin topa enberdad cu un curpa di un dama tur na sanger y e curpa tabata benta entre e sientanan di auto.

Investigacionnan a cuminsa
Mesora e patruya na e sitio a pidi pa presencia di autoridad competente. Fiscal di e tempo ey Hoogland y tambe e inspectornan di e tempo ey Nicolaas y Peterson, sub inspector Bergen y tambe e recherchenan Josepha, Wauben, Liendo di  departamento tecnico di polis y un cantidad di otro agentenan policial tabata na e sitio y asina a cuminsa di biaha cu un investigacion profundo.

For di investigacionnan a cuminsa sali na cla,  pakiko e jeep tabata para cara pa lama, nan a calcula cu e intencion lo tabata pa laga e jeep core cay den lama, pero door cu e tirenan a corta riba e barancanan skerpi, e jeep a keda pega den un buraco, no por a logra benta e auto den lama. Tambe a wordo calcula cu e auto tabata biniendo cu velocidad halto te cu un di e schroefnan di e wiel tabata kibra y a wordo haya banda di e vehiculo.

E dama morto den e jeep tabata Melia Gelvil di 25 aña di nacionalidad Haitiano y lo tabata traha como maid na un cas di famia y tabata traha anochi riba e snack truck di Sr. Kwidama.


Na momento cu nan tabata sacando e curpa sin bida di Melia Gelvis(25)

Na momento cu Dr. De Cuba a constata morto a informa autoridad na e sitio cu e dama tabata 8 luna na estado y lo tabata tin entre 4 pa 6 ora morto. Segun e declaracion di dokter, e dama a wordo asesina den oranan hopi trempan di mainta.


Fotografonan di e tempo ey yudando carga e curpa di e dama Haitiano

Dama a wordo asesina cu varios tiro
For di e prome investigacionnan haci a wordo calcula cu varios biaha a wordo tira, pero tres bala a penetra e curpa di e victima. Mientras den e Jeep Blazer mes tabata tin varios cartucho mas. Tambe a sali na cla cu e asesinato no a tuma luga caminda e jeep a wordo haya.


Un arma di candela y un botter di whiskey haya dilanti den e auto

E arma di candela y un botter di whiskey a wordo haya dilanti den e jeep. Dilanti di e clutch autoridad a haya un maleta, kiko tabata tin den e maleta? segun informacion di hendenan yega na e caso den e maleta lo tabata tin 10 mil dollar.

Jeep Blazer tabata pertenece na M. Kwidama
E Jeep Blazer tabata pertenece na M. Kwidama, kende algun siman prome a gana esaki na rifa. Despues cu polis a cambia e tire di e jeep, e la keda confisca pa mas investigacion y cu takelwagen e la wordo hiba warda di polis.

Buskeda pa Sr. Kwidama sin resultado
Sr. Kwidama no a yega cas tampoco y no por a wordo localisa, mesora a cuminsa cu un buskeda pa Sr. Kwidama, te den oranan laat a busca, pero sin resultado. Diasabra a cera sin cu su famia tabata sa di su paradero. Polis a busca den e area unda nan a haya e Blazer pero sin resultado. Na e momento ey a cuminsa specula cu e lo por a tira su curpa na awa.

Curpa sin bida di Sr. Kwidama a wordo localisa
Diadomingo den oranan di mainta, un meneer di fam Tromp cu ta biba na Alto Vista a dicidi di bay dal un cana na e costa pariba di Alto Vista y na Boca Chiquito e la bin topa cu un curpa pega riba un baranca, mesora Mr. Tromp a avisa polis. Varios unidad di polis a bay na Boca Chiquito y enberdad nan a bin topa cu e curpa di Sr. Kwidama. E curpa di Kwidama a wordo haya como mas o menos 4 kilometer leu for di unda a bin topa cu e Jeep Blazer. Tur cos tabata mustra cu Kwidama lo a comete suicidio.


Curpa sin bida di Kwidama a wordo localisa

Mesora a cuminsa cuestiona kiko exactamente lo a pasa den e caso tristo aki. Si acaso ta Kwidama mes a asesina e muhe? Unda e la tuma luga? SI Kwidama a comete suicidio of si acaso lo por tabata tin un otro of mas persona envolvi? SI e intencion tabata pa tira e cadaver di e muhe den lama hunto cu e jeep? Preguntanan habri cu semper lo keda.

Sr. Kwidama tabata doño di e snack truck “Rayito de luna”
E Sr. Kwidama a nace na Corsou, e la bin Aruba cu e trend di Truck di pan cu tin na Corsou y a introduci esaki e tempo ey  na Aruba, aki na Aruba e la wordo yama Snack truck. E snacktruck di Kwidama “Rayito de Luna” tabata para tur anochi riba e parkinglot dilanti Mai Store den John G. Emanstraat. Sr Kwidama tabata un conocido catochero tambe. E tabata un homber casa cu un famia y tabata biba na playa.

Dama haitiano tabata tin casi 2 aña na Aruba
Melia Gelvis tabata casa of tabata biba cu su pareha na Haiti, nan tabata tin un yiu di 2 aña hunto. Riba un dia  Melia a dicidi di laga su famia atras pa bin traha na Aruba, e la laga su yiu, un baby hopi chikito y e tata na Haiti. Melia lo tabata tin casi dos aña na Aruba.


Curpa di Kwidama ta wordo hiba na e auto di Cherche

Curpanan a keda confisca pa mas investigacion
Ambos curpa a keda confisca pa autoridad pa mas investigacion. Durante otro investigacionnan haci a bin resulta cu e Melia a ricibi varios impacto di bala. E la haya 3 den su cabes y dos den su brasa.

Un otro version di locual por a sosode
Segun un version cu nos a ricibi di un persona cu tabata un bon amigo di Sr. Kwidama, a conta nos un version diferente. Segun su version. Sr. Kwidama no a mata e dama Haitiano, e dama a wordo asesina pa un di tres persona y nan ta hopi convenci cu esaki lo por a pasa asina. Esaki nan tambe ta keda speculacion.

Plan pa caba cu e relacion amoroso scondi a bay robes
Sr. Kwidama y Melia lo tabata tin un relacion amoroso scondi y for di e relacion aki Melia a sali na estado. Sr. Kwidama tabata un homber casa y tabata tin un famia, riba dje Melia tabata hopi mas hoben cu su persona. Kwidama no tabata kier pa esaki sali na cla, paso e no kier a perde su famia. Na momento cu e pareha of casa di Melia a yega Aruba, no ta conoci si tabata pa regla cuenta of pa uni bek cu Melia.

Kwidama mesora a pensa un plan, con pa saca su curpa for di e problema aki. E la dicidi cu e lo bay paga e homber aparentemente un 10 mil dollar pa e homber cu Melia bay for di Aruba, nan desaparece, pa asina Kwidama lo por a sigui su bida normal.

Revancha of algo a bay robes?
Segun e version aki, probablemente Sr. Kwidama lo a pone den e maleta un 10 mil dollar ney, pa duna e homber pa asina e bandona Aruba cu Melia. Sr. Kwidama no tabata sa cu e homber haitiano posiblemente a mira e chens aki, pa tuma su revancha. E homber haitiano muy probablemente lo a hunga un wega cu nan dos.

E homber niun momento lo tabata tin e intencion di tuma e placa y bay cu Melia, paso e maletin di placa a wordo haya den e auto. Mas sigur e lo a bay cu nan y lo a tira Melia mata, tambe nan ta pensa cu e lo a purba benta e auto den lama, pero e no a logra esaki. Kiko e lo por a haci cu Sr. Kwidama tabata tin tres scenario: e lo por a exigi’e bula na awa, of a pushe na awa of lo por a dal’e cu algo mande off y a tir’e na lama. Preguntanan cu a keda den aire.

E homber Haitiano lo a haci esaki pa puro venganza, pa paganan pa e traicion cu e lo a sinti ora cu e la haya sa cu su pareha/casa tabata tin un relacion amoroso y a sali na estado di un otro homber.

E homber Haitiano ora e la caba di a tuma su venganza, e lo a bandona e sitio sin mishi cu e maleta cu placa aden, mustrando asina cu e no tabata interesa den placa.


E maletin cu aparentemente 10 mil dollar den dje

Aparentemente autoridad lo tabata na altura cu e la drenta Aruba, pero nunca a logra pone man riba dje. Ni unda e la sconde, ni ki dia of con e lo sali for di Aruba no ta conoci, segun nos a compronde for di e fuente,  autoridad lo a busk’e, pero nunca a logra pone man riba dje.. Kiko a pasa cu ne of unda e la bay tambe a keda un misterio.

Un crimen passional
Segun autoridad, nan a investiga e caso aki intensivamente y lo a conclui cu tabata trata mas bien di un crimen passional. Sr. Kwidama a asesina e Melia y despues a pone fin na su bida. Un caso cu a laga hopi pregunta habri, un caso dificil pa nos por compronde.

Paso si acaso ta Sr. Kwidama a mata Melia, e tabata tin un arma carga den su poder, e lo tabata mas facil y mas lihe pa a tira su mes mata y no bula na lama pa ansha, sofoca pasa tanto dolor y sufrimento prome cu muri. Esaki ta algo cu nos a keda cuestiona.

Un caso rondona pa misterio y miho bisa un Caso Cerrado.

 

 

Homber (22) a mata su tata den un forma hopi cruel, segun e yiu su tata a mata su mama y pa e motibo ey e mester a mata su tata

Canashito:  Riba diamars anochi 3 di november 1981, tabata mustra un anochi trankilom. Cayetano Molina a bay na e bar caminda su yiu ta traha y a bebe algo, e la keda warda te ora e bar a cera pa asina duna su yiu un lift pa cas. Tur cos tabata mustra masha normal, nan a pasa na e doño di e bar pa entrega e benta di dia y dje nan a dicidi di haci e anochi un poco mas largo, nan a bay San Nicolas pa sigui dal drinks. Tur cos tabata bayendo bon, te na e  momento cu a yega di bay cas, yegando Canashito e tata cu e yiu a haya un discussion fuerte cu otro.

E yiu a rabia asina hopi, cu cosnan di pasado lo a bin halto y sin por a razona, e la pasa man pa un obheto skerpi cu e tabata tin den su poder y a hinca su tata dos biaha. Den un caminda di tera na Canashito, e tata a logra asina mes baha for di e auto pa e cana bay cas, pero e yiu no a haya dos hinca suficiente, su intencion tabata pa mata su propio tata. E  la cuminsa bati su tata cu piedra, despues e la pasa man pa un serbete y a choca su tata. Rabia tabata domina e yiu cu ni e choca ainda no tabata basta, ultimo pa ta sigur cu su tata lo muri, e la pasa man pa un baranca grandi cu tabata tin su dilanti y a baha esaki riba su tata. Na momento cu e tata casi no tabata duna señal di bida mas, e la lastra su tata y a bente den un mondi canto di e caminda di tera.

E yiu sin un punta di remordimento a subi e auto y a bay bek San Nicolas. Hopi lihe e la fliet e auto un otro color y a haci’e limpi pa asina kita tur evidencia. Cayetano tabata traha cu Thiel Cooperation, Cayetano tabata perdi pa algun dia, te dia 7 di November 1981, un persona cu a pasa riba e caminda di tera na Canashito a bin topa cu un curpa sin bida tira den mondi, tur cos tabata mustra cu e persona aki a wordo asesina na un forma hopi cruel.

E yiu a admiti cu e la asesina su tata y segun su declaracionnan , cu ora e la bandona su isla natal pa bin Aruba, su meta tabata pa mata su tata. Segun e yiu, su tata lo a mata su mama, e la declara cu e la mira con su tata a mata su mama. Pero for di investigacionnan haci, e esaki no tabata e caso, maske a dune un declaracion medico den cual ta poni cu su mama a fayece na Hospital na Corsou di un morto natural. E la keda insisti cu ta su tata a mata su mama y cu e a mira esaki sosode.

E caso a dura un aña pa por a yega na un sentencia. Fiscal y abogado di Molina a pidi hues pa tene cuenta cu e raportnan di psycholoog, reclassering y di psikiater, cu Molina ta ontoerekeningsvatbaar pa locual e la haci. Nan a pidi pa para e proceso y interne mesora pa 1 aña den Capriles Kliniek na Corsou.

Molina den corte a declara cu e la cuminsa odia su tata, despues cu algun aña pasa e la mira con su tata a mata su mama na Boneiro. Tambe e la declara di a mira con pa añanan largo su tata tabata maltrata su mama y no tabata paga pa alimentacion pa su 14 yiu cu e tabata tin cu su mama. Segun W. Molina cu su tata mester a paga pa tur esaki cu su propio bida.

For di e raportnan a sali na cla cu Molina ta un persona cu mente primitivo, su forma di pensa ta paso su tata a pone su mama sufri hopi, ta dun’e derecho di mata su tata. Expertonan a describi su mente como uno cu no a desaroya e ta mescos cu di un mucha chikito y cu no ta tene cuenta cu niun consecuencia.