GARMISCH PARTENKIRCHEN – Mediconan na Alemania a haya un mutacion nobo desconoci di coronavirus. 35 hende a wordo contagia caba cu e variacion nobo aki.
E mutacion nobo aki a sali na cla siman pasa na momento cu a haci algun test pa coronavirus na un hospital na Garmisch Partenkirchen. E aparato a indica cu tawata tin un virus presente pero no a marca un di e mutacionnan conoci. Pues, esaki ta un variacion nobo.
E fin di siman cu a pasa tur paciente cu tawata hospeda na e hospital en cuestion a wordo someti na test pa coronavirus. For di e test a sali 73 contagio, di cual mas cu mitar tawata tin e variacion nobo.
Si e mutacion Aleman ta mas contagioso of mas peligroso ainda no ta conoci, esaki ta bou di investigacion. Durante e proximo dianan ta spera di haya contesta ariba esaki.
E medidanan pa cu coronavirus a wordo haci mas estricto pa evita mas plamamento. Te cu awor casi 50.000 Aleman a fayece a consecuencia di coronavirus, bastante mas cu na Hulanda (13.000).
Ex dokter di cas y experto den griep, Ted van Essen, ta haya e variacion Britanico preocupante. Segun e, ainda mas medida mester wordo tuma.
Cu un virus ta varia, no ta algo abnormal, segun Frank Niederbühl, director di e clinica na Garmisch-Partenkirchen. Desde e comienso di e pandemia a wordo constata mundialmente 12.000 variacion chikito di e virus aki.
