Home » Minister di Cultura Xiomara Maduro ta informa: Dia di Betico lo ser celebra den un forma diferente cu un Manifestacion Cultural Virtual y Acto Protocolar cu asistencia limita Cumpliendo cu e regla y protocol di Crisis Team y Departamento di Salud Publico

Minister di Cultura Xiomara Maduro ta informa: Dia di Betico lo ser celebra den un forma diferente cu un Manifestacion Cultural Virtual y Acto Protocolar cu asistencia limita Cumpliendo cu e regla y protocol di Crisis Team y Departamento di Salud Publico

by Admin
0 comment 61 views

 

 

ORANJESTAD – Durante un conferencia di prensa Minister di Cultura a trece dilanti cu manera tur aña, riba dia 25 di januari, Gobierno di Aruba, pa medio di Ministerio di Cultura y Comision Celebracion Dianan Nacional ta organisa e actividadnan pa celebra Dia di Betico, e fecha natal di Gilberto François Betico Croes, Nos Libertador. Di e forma aki Aruba ta dun’e su homenahe bon mereci y asina un y tur por keda recorda su lucha pa e gran logro cual ta Aruba su Status Aparte. E lucha cu a marca historia di Pais Aruba. 

Dia di Betico ta ser celebra cada aña den forma di un Manifestacion Cultural y Acto Protocolar y actividadnan publico den bario. Mirando e hecho cu nos ta confrontando cu e pandemia di Covid-19. Crisisteam ta estricto cu e regla y protocolnan di seguridad, pa tene e situacion bao control y pa evita cu casonan ta aumenta drasticamente, no ta duna permiso pa actividadnan publico. Nos lo celebra e biaha aki na cas den union familiar durante cual famianan lo por enfoca riba e historia di Nos Libertador y kico tur ela haci y logra pa nos Pais.

 

Determinacion, Perseverancia y den Union

Minister Xiomara Maduro a anuncia cu e aña aki e lema di e celebracion ta “Determinacion, Perseverancia y den Union”. Esaki pa acentua e legado cu Betico a laga atras, cu como pais nos por enfrenta y surpasa tur reto. Pa bo logra bo mester ta determina den loke bo ta kere y kier logra, bo enfoke ta pa logra y bo ta keda insisti pa logra esaki. Y den union bo tin e forsa di coherencia pa asina tin un pueblo hunto cubo. 

 

Manifestacion Cultural Virtual 

Pa locual ta e Manifestacion Cultural esaki lo tuma luga den un forma virtual caminda cu comunidad lo por aprecia esaki via un programa cultural dedica na memoria di Betico Croes, Nos Libertador. Esaki lo ser pasa via nos canalnan di television y 

 

plataformanan social. E programa ta un presentacion di musica, canto y baile. A scoge pa un cantidad limita di artista pa por cumpli cu e regla y protocol. 

Henter comunidad ta ser invita pa sintonisa e programa cultural aki riba diadomingo 24 di januari iniciando pa 8 or di anochi via nos canalnan di television y otro medionan.

 

Acto Protocolar 

Pa locual ta e Acto Protocolar di dia 25 di januari pa 9 or di mainta mester tuma luga cu un cantidad di invitado hopi limita. Lo tin presentacion di musico cu un duo di mucha, tambe e discurso di Prome Minister di Aruba, sra Evelyn Wever – Croes.  Durante e Acto Protocolar lo mantene tur regla y protocol di DVG y Crisis Team e.o:

  • Invitadonan lo ta limita 
  • No ta permiti publico
  • E caminda di Vondellaan y Rumbastraat lo wordo cera pa trafico y publico.

 

Minister Xiomara Maduro a indica cu e eventonan lo ta diferente cu locual nos ta custumbra cune. No ta permiti publico pa ta presente. Mirando e situacion y decision di Crisis Team ta haci un apelacion na tur medio, canalnan di television, radionan y otro plataformanan pa re-transmiti e Programa Cultural y Acto Protocolar pa asina e por yega den tur hogar. Un biaha mas nos ta gradici prensa pa semper sostene Dianan Nacional y ta gradici  nan pa nan comprension  mirando e situacion cu nos ta bibando pa cu Covid19.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio