Mi por a tuma nota di un articulo unda cu un ex parlamentario Sr Melvin Tromp, e mucha manda di Mike Eman, ta purba na hustifica e corupcion cu tin den partido AVP. Normalmente mi no ta perde mi tempo cu sr Tromp, pero mi tin di corigi’e paso ta claro cu e no a siña nada sinta den parlamento di procesonan. Y sigur den e relato aki lo mi usa sr Tromp y no lo usa su nomber di cariño Donkey paso mi ta insultando e bestia paso un burico ta un bestia hopi sabi y sigur dunando un cabes di pinda fofo e nomber di Donkey ta un insulto pa e bestia.
Credencialnan di un Minister
Un minister ta pasa un screening a base di e decreto ministerial di 2013. E resultado ta den man di e formador di gobierno y tambe Gobernador ta haya esaki. Unabes cu e pasa e screening aki un parlamentario mester aproba e persona su credencialnan cu a yega parlamento y manera cu ela bin ta pasa di 2013. Maske personalmente ta paso mi ta haya e screening aki cu falta di djente mi a bin cu e ley di screening cu lamentablemente no a ser aproba y aigur unda AVP sigur a vota contra esaki.
Sr. Melvin Tromp si ta sostene corupcion
Na momento cu a haci entrada hudicial na cas di ex Minister Otmar Oduber ya su persona no tabata minister mas den Gabinete Evelyn Wever-Croes y sigur mane mi a bisa caba, cada ken ta responsabel pa su actonan. Al contrario di sr Tromp cu si a cambia e ley di screening di Marlon Sneek den parlamento pa percura pa su colega y minister e tempo ey ainda, esta sr Paul Croes cu tabata den KIA por a keda como Minister den Gabinete Mike Eman II y cu na final di dia a cobra overbruggingstoelage y ainda segun por a compronde cu bay cu VUT tambe sacando mas placa ainda di pueblo.
Partido AVP no a sostene e ley di screening
Na oktober ultimo nos a trata e ley di screening unda cu AVP den su totalidad no a sostene esaki. E pakico ta facil, esta partido AVP ta un cla di corupcion. Si e ley aki a pasa unda cu sr Benny Sevinger actual parlamentario cu ta bao investigacion y ta un sospechoso hamas lo por bira minister mas na Aruba. Mescos ta conta pa sr Mike Eman cu ta bao investigacion pa labamento di placa unda cu entre otro a tuma placa di sr Roberto Rincon cu ta sera pa corupcion unda nos ta papia di diferente transaccionan di $50.000 pa core campaña. Sr Richard Arends cu tambe pronto lo ta bao investigacion pa su rol den RDA y sigur mester duna cuenta di con a gaña den screening na 2016 cu no tabatin un funcion den RDA tampoco lo por bira Minister mas. Pues si e ley a pasa partido AVP den su totalidad lo ta den pio berguensa cu locual ya nan ta awo cu cada bes tin entrada hudicial den cas di parlamentario Benny Sevinger. Y sigur dia pa dia pueblo mes ta wak cu partido AVP ta un clan di corupcion.
Parlamentario Edgard Vrolijk semper a lucha pa combati corupcion
Mi persona a percura pa bin cu e ley di financiamento di partidonan politico y candidato p’asina pueblo por sa di unda cada partido ta haya nan fondo y sigur cada candidato tin di duna cuenta, locual cu sr Tromp hamas a tribi di haci paso su persona tambe ta parti di e clan di corupcion unda a haci posibel cu su persona por a bende terenonan erfpacht despues cu a converti esakinan pa medio di e ex Minsiter Benny Sevinger den terenonan comercial y por a enrikese su mes. Banda di esaki a percura pa bin cu e ley di screening di Ministers y cu pronto lo ta bek cu esaki paso Aruba mester di e ley aki. Banda di esaki nos a percura pa pasa e ley nobo pa destaho publico cos cu hamas sr Tromp a pensa di haci y sigur mi persona hamas por ser compara cu sr Tromp paso sr Tromp no tin ningun clase di integridad y pio ainda paso su persona no conoce ningun clase di moralidad.
Pa termina y no perde mas tempo cu sr Melvin Tromp nos tin di conclui cu sr Tromp y su partido AVP ta un clan di corupcion y esaki ta hopi claro den bista cu nan clan a sa di produci un grupo grandi di ex ministernan corupto bao diferente gobernacion. Partido AVP tin 2 minister condena cu ta ex lider di AVP sr Tico Croes y ex minister Sr Paul Croes. Y sigur na e momentonan aki partido AVP tin dos ex minister bao di investigacion pa corupcion, fraude y labamento di placa cu ta lider actual di AVP sr Mike Eman y sr Benny Sevinger ex minister y actual parlamentario pa partido AVP cu sigur t’un berguensa pa parlamento y pa pueblo. Pues ta bon pa sr Tromp wak bon den su cura y sigur evalua su funcionamento como ex parlamentario di a sostene malversion di fondo di pais Aruba y sigur corupcion den e pais aki unda su persona hunto cu e clan di AVP a sa di cambia e ley di screening pa acomoda un ex Minister cu e momento ey tabata sera den KIA pa corupcion, fraude, mal uso di poder y labamento di placa.