Siman pasa hunto cu Parlamentario Endy Croes a reuni cu dos ehecutivo di Eagle LNG, esta e presidente sr. Sean Lalani y vice presidente di desaroyo comercial sr. Filipe Pinto. Manera ta conoci siman pasa Eagle LNG cu RDA a firma un acuerdo di exclusividad pa desaroya un planta di gas na Aruba.
EAGLE LNG PARTNERS
Eagle LNG su oficina principal ta situa na Houston, Texas y ta un grupo priva cu ta forma parti di “The Energy & Minerals Group”. E compania tin diferente planta den Caribe y ta percura pa distribui gas natural pa diferente paisnan Caribense. Esaki a conduci cu a crea hopi cupo di empleo den e paisnan aki y un impacto economico positivo grandi. E meta principal di e compania ta pa ofrece LNG limpi pa diferente mercado, manera maritimo, energia, exportacion y “mining”. Pa asina consecuentemente baha costo di awa y electricidad.
PLANTA DI GAS NA ARUBA
Den combersacionnan cu nos a hiba cu sr. Lalani y sr. Filipe nan a indica cu e planta cu Eagle LNG kier construi na Aruba ta similar na e planta cu nan ta opera na Jacksonville, Florida. Ta trata di un facilidad “small-scale” cu lo distribui gas natural pa WEB y paisnan Caribense den nos region. Riba website di e compania, www.eaglelng.com por haya tur informacion di tur e diferente plantanan cu e compania tin y cu nan ta opera.
INVERSION DI EAGLE LNG
Awor cu a firma e acuerdo di exclusividad e inversionnan di parti di Eagle LNG lo inicia mes ora. Esaki e presidente di Eagle LNG sr. Lanani mes a indica. E parti di “engineering” lo inicia aworaki y pa e parti aki ya caba tin inversionnan ta wordo haci y cupo di trabou ta wordo crea. Simultaneamente e proceso pa adkeri tur permiso necesario a wordo inicia. Ta premira cu na Juni e construccion di e planta lo inicia. Presidente di Eagle LNG a indicia cu pa e fase di construccion lo crea directamente alrededor di 150 cupo di trabou. Y ta trata kinan di cuponan di trabou local.
PA CONCLUI
Algun luna pasa a comunica e necesidad y importancia pa kibra e contract cu Citgo, pa ainsa por hacie posibel pa capitalisa riba oportunidadnan nobo pa pais Aruba. Fey momento cu a kibra e contract a inicia e proceso transparente pa adkeri inversionnan nobo y siman pasa Aruba por a experencia e balor agrega di a kibra e contract cu CITGO. Un oportunidad unico pa Aruba su economia a wordo cristalisa cu firmamento entre RDA y Eagle LNG. E inversion di 185 miyon dollar cu Eagle LNG ta bay haci lo yuda nos sali mas fuerte di e crisis actual.