ORANJESTAD – Cu e desaroyonan pa loke ta trata e pandemia mundial di COVID-19, por ripara cu –manera ta posibel y cu tin e oportunidad presente- hopi persona ta trahando for di cas. Aña pasa, Oficina di Turismo a mira oportunidad y a lansa e ‘One happy workation’ cu ta duna e bishitante e oportunidad di traha for di Aruba. E programa a resulta bon y ta sigui representa un oportunidad clave den 2021! Lo sigui traha riba esaki e expande e programa pa inclui mas pais
E promocion ‘One happy workation’ a wordo bon ricibi y e bishitantenan interesa por keda Aruba te cu un maximo di 90 dia.
Desde cu e campaña aki a wordo lansa, di september 2020 pa december 2020 un total di 3.161 persona a bishita Aruba –sea nan so of acompaña cu nan famia- cu e proposito pa traha profesionalmente for di nan luga di estadia. 85% di e grupo aki tawata procdente di Norte America. Interesante pa sa ta cu pa 62% e tawata pa prome biaha cu nan a bishita nos isla. Pa loke ta trata nan edad: 43% tawata entre edad di 20 pa 39 y 36% tawata entre edad di 40 pa 59. Un total di 31% a keda den un di nos hotelnan highrise, 5% a keda den low rise y 30% a keda den un timeshare. Mayoria a keda den loke nos ta yama ‘otro acomodacionnan’ cu ta 34%.
Por bisa cu e promocion aki a haya hopi bon acohida specificamente den e mercado di Merca unda famianan a mira un oportunidad pa sali for di nan pais y bishita nos isla pa un tempo prolonga. Mester mencionan cu e bishitantenan pa nos destinacion ta pasa door di diferente protocol prome cu nan por bishita nos isla pero cu tur ta bisa cu e ta ‘bale la pena’ pasobra –apesar di e reto pa cu loke e pandemia di COVID-19 ta trece cu ne, nan ta sinti nan mes sigur na Aruba.
Mescos cu otro destinacionnan, nos isla ta pasando den momentonan di reto pa loke ta trata e pandemia aki. Ta importante pa nos tur sigui e protocolnan manera stipula door di diferente instancianan. Hunto nos lo vence y nos isla su economia y su turismo lo sigui florece.