WASHINGTON – E buscadornan di problema cu a drenta e edificio di parlamento Mericano a bai cu intencion di asesina politiconan. Esaki, segun e fiscalnan cu ta persiguiendo Jacob Chansley, un homber cu ta pertenece na e moveshon QAnon, kende durante e disturbionan mortal na Washington tawata tin un cuero di bestia y cacho bisti.
Chansley ta pertenece na e grupo cu a drenta den Capitol na momento cu e aprobacion di e resultado di eleccion tawata andando. Segun departamento di husticia, e homber aki a laga un carta atras pa vicepresidente Mike Pence cu e mensahe: „Ta un cuestion di tempo. Husticia lo bin.”
Durante e investigacion tambe lo a surgi pruebanan cu e buscadornan di problema tawata „planeando pa hiba funcionarionan preso y asesina nan.” Esaki lo a resulta di ta mas bien palabran y hechonan di Chansley, kende ta wordo describi como un drogadicto cu problema psychiatrico y pa e motibo ey ta forma un peliger si e huy. Pesey e fiscalnan kier pa e keda sera.
„Chansley a papia abiertamente tocante su creencia, cu e ta un extraterrestre. Un ser di un nivel mas halto cu a wordo manda na mundo pa biaha pa un otro realidad”, segun fiscalnan. Esakinan ta sospecha e homber di a forma parti di un intento di golpe di estado. Media Mericano a bisa cu despues di e disturbionan Chansley mes a meld cerca FBI.
Husticia Mericano ta persiguiendo decenas di hende cu a participa den e disturbio, caminda oficinanan a wordo vandalisa y agentenan policial a wordo agredi. Pa haya e hendenan aki no a costa hopi tempo mirando e tantisimo imagennan cu a wordo comparti ariba social media.