E tan espera ekipo di experto di World Health Organization (WHO), cu ta encarga cu e investigacion di e origen di coronavirus a yega awe, despues di lunas di negociacion, na e ciudad Chines di Wuhan, na unda na final di 2019 a cuminsa registra e prome contagionan di covid.
Imagennan retransmiti pa e cadena estatal CGTN a mustra awe e yegada di e miembronan di e ekipo na aeropuerto di e ciudad.
No obstante, e ekipo lo mester cumpli cu e protocolo di prevencion di covid y keda den cuarentena durante 14 dia prome cu nan por cuminsa cu e investigacion, asina WHO a confirma awe via Twitter.
E mision aki ta un prioridad di WHO, y ta wordo forma pa scientificonan di diferente organisacion internacional di Estados Unidos, Hapon, Rusia, Reino Unido, Hulanda, Dinamarca, Australia, Vietnam, Alemania y Qatar.
E yegada di e ekipo a causa polemica despues cu e director general di WHO, Tedros Adhanom Ghebreyesus, a afirma di ta “bastante decepciona” pa motibo di e obstaculonan cu Peking tawata poniendo pa e mision, despues di lunas di negociacion, aunque autoridnan Chino a nega di a obstaculiza e mision.
El obhetivo di e mision ta pa haya e origen y canalnan di transmision. A pesar di lunas di investigacion, solamente ta conoci cu e ta un virus cu a wordo transmiti for di animal pa hende y cu ela wordo plama ariba un mercado di Wuhan.
Ta existo sospecho cu un vleermuis cu ta habita den parti sur de China lo por a participa den e transmision, cu lo por a pasa pa mas di un especie prome cu el a yega na e ser humano.
Segun un informe di Terminos de Referencia (TOR) pa China, publica door di WHO dia 31 de juli, ainda no ti claridad si e mercado di Wuhan “tawata e fuente di e infeccion, of el a actua como amplificador pa e contagio entre humanonan of tawata trata di un combinacion di e factornan aki”.