Algun sucedido cu a pasa riba un dia manera awe:
- Explosion trahado di Watervoorzieningsdienst
- Candela grandi den L.A.G.O. domina den dos ora di tempo
- Dama ta saca sambechi pa polis
- Prome radio station riba FM
13 di Januari 1953: Dos trahado di gobierno gravemente herida den un explosion di dynamiet
Den oranan di mainta na Mondi Fierno/Seroe Fierno, dos trahado di Watervoorzieningsdienst a keda gravemente herida. Ambos a wordo hiba cu hopi urgencia pa San Pedro Hospital.
Durante cobamento di un geet pa instala tuberia di awa. E beitel di e machine di groin a dal net riba un patroonchi di e dynamiet cu ta core den terra, esaki a causa un un explosion. Na e sitio a pidi pa presencia di recherche di Santa Cruz pa haci un investigacion y a resulta cu e explosion no tabata intencional pero un accident.
Desde hopi aña caba e tempo ey yama Watervoorzieningsdienst (actualmente WEB) tbt haci uzo di materialnan explosivo na momento cu mester coba pa pasa e tuberianan di awa bou tera. E explosionnan cu dynamiet tabata yuda pa habri e tera. Prome cu sigui coba semper ta controla si tur e patroonchinan di dynamiet si nan a bula caba. Esaki nan tabata hacie door di check si tur e wayanan cu ta comunica cu otro a kibra. Si un patroonchi no a rementa ta bolbe trata na rementa esaki, te ora tur a rementa.
E dos trahado nan Sr. Rasmijn y Kelly a keda seriamente herida.
Sr. Rasmijn a haya algun herida basta serio na su braza y pia. Sr. Kelly a wordo seriamente herida na su pia drechi, cual a kibra na varios parti.
13 januari 1955:Brandweer di Lago a logra domina un candela hopi grandi pa evita un desaster.
Diahuebs 13 di januari, den careda di 1’or y cuarto, noticia a cuminsa core rond di un candela enorme den L.A.G.O.
Mesora centenares di hende a bay direccion di L.A.G.O pa ta testigo di e candela enorme aki.
Hopi mirones tabata para patras di e cura di L.A.G.O. pa ta testigo di e candela enorme. Un candela cu pa hopi aña Aruba no a conoce. E hendenan tabata subi riba dak di cas, riba auto etc. pa trata na mira e candela.
Huma preto y diki tabata cubri e parti pabou di e tereno di L.A.G.O. Mientras tanto cu e vlamnan tabata trata na sali for di patras di e cortina grandi di huma, di otro banda e trahadonan di L.A.G.O. tabata sigui haci nan trabou, den tur e desordo di sirena y huma.
Den e waf di L.A.G.O. unda e tankero nan tabata mara, full dilanti tabata tin e tankero Noruego Hammersborg mara, abordo tabata tin 40 miembro di tripulante. E tankero tabata pisa 10.712 ton, e tabata mara na e gasoline deck nr. 1. E tankero mester a carga 7 diferente producto petrolero, na momento cu e la cuminsa carga gasolin, ta net e momento e candela a cuminsa. No tabata sigur kiko por a causa e candela enorme aki tabata wordo a asumi cu e pipa cu ta pomp azeta pa e barco lo tabata tin un lek y e azeta tabata basha riba e pier, tambe ta pensa cu por ta bin di coriente estatico, esaki por a conduci na un explosion y a start un candela. E candela lo a cuminsa na e waf of riba e pier y esaki a expande, a busca su caminda y a bay na unda e tankernan ta mara. Como cu Hammersborg tabata e tankero mara mas dilanti, e ta esun prome y esun cu a haya mas daño di candela. Na momento cu e candela a start y a cuminsa mira cu e lo por expande y causa daño na e tankero Hammersborg, mesora a move tur e otro tankeronan cu tabata mara patras di Hammersborg pa un luga mas safe.
E cayente di e candela a haci hopi daño na varios otro coneccionnan di pipa y esaki a haci posibel cu mas azeta a cay riba e pier, e candela tabata keda haya mas azeta pa sigui kima. Naturalmente a cera e craanchinan di tur e pipanan aki, pero asina mes suficiente azeta a basha pa e candela por a sigui kima. E vlamnan tabata asina grandi, cu e lo coy riba e tankero tambe, e brug, memey di e tankero y e dek patras a pega candela.
E vlamnan tabata mas cu 20 meter halto, te cu e la kima e botonan di salbabida cu tabata mara na halto riba e Tankero.
Henter e ekipo di brandweer di L.A.G.O. a keda activa pa combati e candela, ambulancenan tambe a wordo manda na e entrada di e pier pa keda Standby pa cualke herido. Dokter cu EHBO casesnan tambe tabata para cla pa cualke eventualidad. Polis di L.A.G.O. a percura pa niun hende no subi riba e pier. Brandweer, polis y ambulance di gobierno a keda riba un standby.
Dos remolcado di lago cu e cañonnan di awa tabata combati e candela for di riba lama. Den full e candela feros aki, un persona a resulta herida. Sr. Charles A. Campbell, no a logra sali na tempo for di e tankero, cu consecuencia cu su paña a coy candela, na prome instante ela keda lora riba e dek pa mira si e candela por paga, pero ora e la ripara cu e no tabata kier a paga, e la dicidi di bula na awa. Mesora su tras un boto chikito a pasa busca sr. Campbell e tabata tin kemaduranan basta serio y a wordo transporta di biaha pa hospital.
E daño haci na e barco y na e dek a wordo calcula den careda di mey miyon florin. Den dos ora brandweer a logra domina e candela enorme aki. E pier di e waf tambe a haya basta daño. E pipanan cu tabata wordo poni na e tankeronan tambe a keda completament destrui. Danki na e accion lihe di brandweer a logra domina e candela y paga esaki y asina evitando un desaster hopi grandi.
13 januari 1972: Dama no kier a sigui ordo di polis y a saca sambechi pa polis
Den careda di 2’or di merdia na altura di e tempo ey crusada di Pos Chikito (actualmente rotonde Pos Chikito), polis tabata haciendo un control di trafico un pickup maneha pa un dama a pasa den lus cora. Mesora e agentenan a grita e dama tras di stuur pa e para e vehiculo. E dama a para e pickup como un 100 meter mas leu. Na momento cu e polisnan a bise pa e core bin bek na e crusada, e dama chauffeur a dicidi di start e auto y a sigui core. Mesora polis a bay su tras y a cuminsa un persecusion cu no a dura hopi, polis a logra para e pick up. Na momento cu polis a pidi’e pa su rijbewijs, enbes di duna e agente policial su rijbewijs, e la saca un sambechi pa polis. E agentenan a logra domina e dama y a kita e sambechi for di dje. E dama no tabata tin rijbewijs, e la haya varios boet y despues polis mes a hibe su cas.
13 januari 1973: Prome radio Fm stereo a bay den aire na Aruba.
Dia 13 di januari for di 7’or y mey di mainta e prome radiostation FM stereo na Aruba a bay den aire, Canal FM 90, Doño di e station di Radio aki tabata e tempo ey Sr. Albertico M. Arends dfm. kende e tempo ey tabata miembro di Staten y Eilandsraad di Aruba.
Albertico Arends a haya hopi felicitacion e tempo ey pa su studio nobo y e equipo nobo di transmission. E tempo ey Canal 90 a cuminsa transmiti for di mainta 7’or y mey y tabata cera su programacion 11’or di anochi. E station tabata tin un colecion di mas o menos mil disco procedente di Estados Unidos y Venezuela. Den oranan di anochi e station tabata toca musica tranquilo, esaki tabata for di 8’or y mey te 11’or di anochi musica clasico. E studio pa e tempo ey tabata hopi moderno y bon ekipa.