Home History of Aruba Historia di Aruba: Ariba un dia manera awe 12 di januari

Historia di Aruba: Ariba un dia manera awe 12 di januari

SHARE

Algun sucedido cu a tuma luga riba e fecha di 12 di januari

12 Januari 1970: Un boto venezolano a zink den e entrada di Waf di Barcadera.


Diadomingo 11 pa 12 di Januari 1970, Un boto cu tabata nabega bou bandera venezolano yama ” Estrella del Oriente” a sali for di Los Teques, Venezuela bin direccion di Aruba, abordo tabata tin 5 persona. E boto a sali cu e intencion di lanta algun canasta, riba un distancia di 10 miya for di San Nicolas. Den careda di 3’or di marduga nan a bin ripara cu nan boto a cuminsa pasa awa y mesora nan a dicidi di bay direccion di waf di Barcadera. Algun ora despues cu e boto tabata drentando e waf di barcadera, e motor di e boto a paga y e boto a cuminsa yena cu mas awa, e boto a bay dal contra e rif y un parti a kibra. E 5 miembronan di tripulante abordo a wordo rescata pa e loodsboot y hiba tera. Riba e mesun dia nan a subi un otro boto rumbo Venezuela.

12 januari 1973: Varios tiro a cay den “Vietnam”, Steenweg, Oranjestad.

E caso di tiramento a sosode den careda di 4 or di atardi, na momento cu tabata tin basta hende den Vietnam, e hendenan aki a pasa un susto di nan bida na momento cu nan a scucha varios tiro cay. Steenweg tabata wordo yama “Vietnam” tabata conoci pa su barnan, prostitucion y bendemento di catochi. Un cliente hopi rabia a dicidi di los algun tiro den vietnam, pa motibo cu despues cu e la gana catochi y a bay cobra su premio, e catochero, un meneer Colombiano a nenga di pag’e. E homber a rabia y dicidi di bay cu un arma di candela pa mira si asina e lo por logra cobra su premio. Menos mal cu polis hopi lihe a logra resolve e problema y e ganado a keda deteni pa mas investigacion.

12 januari 1976: homber a keda pega den Grot

Den oranan di merdia dos mucha homber di 17 y 13 aña tabata scuchando gritonan di auxilio saliendo for di Tunnel of Love/ Huliba. Mesora e dos hobennan atento aki a core bay avisa polis. Ora nan a yega enberdad nan a bin topa cu un meneer di fam Graf. E meneer tabata pega den un di e salidanan di e grot. Hopi lihe polis a logra libera e meneer aki. E cabayero aki tabata tin hopi suerte cu e dos hobennan a scucha su gritonan y cu nan a actua door di core bay avisa polis.