Home International Efecto di Whatsapp? Telegram a gana 25 miyon di usuario den solamente...

Efecto di Whatsapp? Telegram a gana 25 miyon di usuario den solamente 72 ora

SHARE

 

E app cu mas a beneficia di e cambio den e sistema di uzo di Whatsapp ta mustra di ta Telegram. 

Despues cu e sistema nobo di uzo di WhatsApp a bin ta causa problema, e competidornan a cuminsa beneficia di e malcontento di e usuarionan.

Un di e app nan cu mas a probecha di e controversia ta Telegram.

E app basa na Londen a haya bon noticia durante ultimo dianan ya cu miles di usuario di su competencia a sigura cu nan lo kier bandona WhatsApp.

E sistema nobo di e app aki di Facebook, a habri un debate tocante e seguridad y privacidad ariba social media.

Cu e sistema nobo aki, Facebook ta busca forma di gana placa desde su plataforma door di permiti e usuarionan pa conecta cu nan clientenan via WhatsApp.

Desde cu a anuncia e cambionan di sistema di e compania, su rival Telegram ya a yega 500 miyon di usuario activo.

Den solamente 72 ora 25 miyon usuario nobo a dicidi di duna oportunidad na e app aki cu a wordo crea na 2013.

E Ruso Pavel Durov, co-fundador di Telegram, a señala cu e extio di e ultimo dianan ta debi na e seguridad cu su app ta ofrece.

“Hendenan ya no ta dispuesto mas pa intercambia nan privacidad pa serviconan gratuito. Ya nan no kier wordo tuma mas como rehen door di e monopolionan tecnologico”, el a bisa.

E controversia di WhatsApp a provoca varios memes, di cual un a wordo publica door di Telegram mes ariba Twitter y ta menciona di manera gracioso, e parecido entre su competencia y Facebook, cual plataforma tambe a wordo critica fuertemente pa motibo di violacionnan di seguridad di su usuarionan.