Tanki Leendert – Catiri , Diamars anochi 10’or pasa habitantenan area di Catiri y Tanki Leendert a informa polis di un accidente fuerte, pero despues a resulta di ta solamente daño material tin.
E accidente a sosode momento cu un Suzuki Alto cu dos dama aden a hala na su man robes y dal na banda di un truck cu ta bende cuminda, den e caso e truck ta bende bolo y mas cos dushi. Propetario tawata caminda pa su cas cu ta keda na Moko.
Despues di e impacto e autonan a keda poco leu di otro unda cu e Suzuki Alto a keda memey di caminda.
Despues di un rato e dama na stuur di e Suzuki a bay direccion di e truck di bolo.
Eynan esnan presente a nota cu e ta bou influencia. Segun e dama ta e tire a kibra y cu e lo drecha esey.
A splike cu e cos no ta asina, sino cu ta trata di un daño basta grandi unda e parti patras di e wiel a dobla, y esaki por lo pronto no por bay core.
E doño cu ta un hoben a bisa e dama ta con e ta bay haci awor?, debi cu ta esey ta su trabou y entrada diario. Sin conta gastonan cu e mester paga.
Na yegada di polis tawata parse cu e dama lo tawata kier a bay di e sitio, pero esey lo no tawata posibel debi cu wiel di e Suzuki banda robes tambe a kibra completamente.
Polis a yega y mesora a detene e dama cu claramente tawata bou influencia.
Transportwagen a wordo pidi y despues di algun rato e la presenta y a hiba e dama warda di Shaba.
No tawata tin hende herida, pero e daño material na e truck di bolo ta grandi y ta truck cu ta wordo usa tur dia pa genera entrada.
