LONDEN – Inglesnan ta hibando un lucha pisa contra coronavirus. Diamars tentnan a wordo lanta pa fungi temporariamente como mortuario pa yuda minimalisa e peso ariba e mortuarionan di hospitalnan, cu ta demasiado yen. Un hospital ya caba a haci uso di e oportunidad aki.
E variante nobo y mas contagioso di e virus ta percurando pa un peso grandi ariba e systema di cuido. Na Surrey, parti zuid di Londen, tin un mortuario completamente yen, cu casi 600 curpa. Autoridadnan local a cuminsa habri lugarnan temporario pa pone e curpanan. Diamars tawata tin 170 curpa den un di e lugarnan temporario, segun Reuters. Na otro lugarnan den e pais te ainda no a mira e necesidad pa extra lugar pa pone curpa di fayecidonan.
Un cantidad di tent a wordo lanta caba durante e prome ola, na comienso di aña pasa. Esakinan lo wordo uza atrobe si bira necesario.
Vacuna
Reino Unido tawata e prome pais Europeo cu a cuminsa vacuna y actualmente ya a aproba tres vacuna: Oxford/AstraZeneca, Pfizer/BioNTech y Moderna. E intencion ta cu pa mitar di februari mas o menos 14 miyon hende wordo vacuna.
Segun premier Boris Johnson, 4 di cada 10 persona ariba edad di 80 aña – cual ta nifica mas o menos 20 porciento di e habitantenan di mas edad cu ta residencia den casnan di cuido – a ricibi un prome dosis. E pais ta premira cu lo bai acelera e proceso pa na fin di luna por vacuna 2 miyon persona pa siman. Durante e prome parti di aña decenas di miyones di Inglesnan lo mester a ricibi un vacuna.
E proceso aki ta di sumo urgencia, pasobra e departamentonan di salud ya caba no por cumpli cu e demanda pa cu cuido di paciente. Johnson a papia dialuna di un fase “peligroso” den e pandemia. “Na algun lugar ya caba tin un scarsedad di aparato di oxigeno pa pacientenan”, el a bisa.