Partido Movimiento Electoral di Pueblo a organisa un workshop di Economia y Finansas. Esaki den cuadro di un di nos metanan como partido pa brinda informacion na nos comunidad. Na mes momento tambe ta brinda e oportunidad pa participa gratis na workshops pa adkeri mas conocimento.
YOUNG PROFESSIONALS
E concepto cu a escohe pa e workshops ta uno caminda “young professionals” ta brinda informacion na “young professionals”. E workshop specifico aki a wordo dirigi pa Myron Koolman, un hoben di 26 aña, cu tin un masters den “Business Administration” y un masters den “Finance”. Durante 4 dia e a brinda e participantenan informacion pa loke ta Aruba su economia y finansas publico.
CONTENIDO DI WORKSHOP
Riba e prome dia di e workshop a elabora riba e historia di Aruba su economia y finansas publico, pero tambe a amplia riba theorianan pa loke ta economia y finansas. A splica entre otro e diferente tipo di economia cu ta existi, e autoridad di Gobierno y Banco Central, y e indicadornan cu ta wordo usa pa calcula e mercado di e produccion total di nos pais.
E siguiente dia a elabora riba nos situacion actual y specificamente riba e fuentenan di entrada di pais Aruba. Tambe a amplia extensamente riba e maneho monetario, e tarea y influencia di e diferente “rating agencies”, y con e pandemia a afecta nos situacion financiero. E dia aki tambe lider di partido Movimiento Electoral di Pueblo, sra. Evelyn Wever-Croes a duna un presentacion y splicacion riba e alivio fiscal.
E delaster dos dianan a elabora riba e situacon actual pa loke ta e relacion cu Hulanda y con e “landspakket”, e condicionnan cu Hulanda a impone riba Aruba, ta afecta nos economia y finansas publico. E workshop a culmina cu entrega di certificado na tur participante.
PA CONCLUI
E interes pa atende e workshop tawata grandi. Pa e motibo ey nos lo ripiti e workshop aki den luna di februari, pa tur esnan cu no a haya oportunidad pa atende esaki por haya chens pa atende. Tawata sumamente interesante pa scucha e diferente discucionnan cu e “young professionalsnan” tawata hiba cu otro riba e oportunidadnan cu nos tin como pais. Por ultimo tin di menciona cu e workshop aki no lo tawata exitoso sin e input di colega di partido Amy Richards, kende tawata instrumental pa cu esaki.
