Home Politics Minister Xiomara Maduro ta informa: Sosten Financiero di 4000 florin pa...

Minister Xiomara Maduro ta informa: Sosten Financiero di 4000 florin pa kwartaal pa empresa chikito y mediano ta sigui den aña 2021 Por aplica desde 15 te cu 20 di januari via MiSVB

SHARE

 

 

ORANJESTAD – Pa surpasa e crisis di COVID19, Gobierno di Aruba ta ofrece yudansa financiero den forma di Sosten Financiero di 4000 florin pa kwartaal na empresanan chikito y mediano cu tin 1 te cu 50 trahador. E meta di e Sosten Financiero ta pa yuda e empresanan cu ta mas afecta pa e crisis di COVID19 cu un fondo cu cual nan por cubri gastonan di operacion di e negoshi. Na mei, juli y oktober 2020 Gobierno a yuda miles di empresa chikito y mediano cu un total di 23,8 miyon florin.

 

Ta reserva 40 miyon den Presupuesto 2021 pa brinda yudansa pa kwartaal

Minister Maduro ta informa cu den e concepto di Presupuesto di Pais Aruba pa aña 2021, Gobierno a reserva 40 miyon florin pa sosten di economia durante e pandemia via Sosten Financiero di kwartaal na Empresa Chikito y Mediano. E suma aki mescos cu e Presupuesto 2021, ainda ta pendiente aprobacion di Parlamento. Presupuesto 2021 ta den e fase di legislacion y ta premira cu pa fin di februari e ley ta yega Parlamento pa su debate y aprobacion.

 

Por aplica pa yudansa desde 15 te 20 di januari via MiSVB. 

Tur empresa cu ta bin na remarca pa e yudansa aki, ta haya un email di notificacion di SVB cu ta contene e condicionnan y un link pa por aplica pa e yudansa financiero aki. Desde 15 te cu 20 di januari por aplica pa e Sosten Financiero via e portal di MiSVB. Pa dia 21 di januari tur pago lo wordo haci via SVB. Pa pregunta riba Sosten Financiero por contact helpdeskmkb@svbaruba.org of subi www.svbaruba.org.