Home » Minister Dangui Oduber Tin varios proyecto di ley importante na caminda pa parlamento

Minister Dangui Oduber Tin varios proyecto di ley importante na caminda pa parlamento

by Admin
0 comment 65 views

 

 

E aña aki 2021 ta un aña di recuperacion y un aña importante pa crea posibilidadnan y oportunidadnan nobo. Pa logra crea oportunidadnan nobo tin algun ley ainda cu mester wordo trata y aproba den parlamento di Aruba. For di hopi tempo ministerio di salud ta trahando riba e proceso di legalisacion y cultivacion di cannabis medicinal. Pa cu esaki ministerio di salud a haci cambionan y a adapta e “Landsverodening Verdovende middelen”. E cambionan di e ley aki pa permiti cultivacion, importacion y exportacion di cannabis medicinal ta cla y ta na caminda pa parlamento. Una bez e ley aki yega parlamento lo mester debati riba dje pa asina yega na un votacion pa aproba e cambionan di e ley aki. Esnan cu realmente kier diversifica nos economia y crea oportunidadnan nobo lo mester bai di acuerdo pa aproba e cambionan aki.

 

Otro ley cu tambe mester ta na caminda pa parlamento ta e ley di TPEF. E presupuesto aki lo mester wordo trata dentro di poco. E fondonan pa TPEF lo ta hopi limita debi na e consequencianan di e pandemia. E sla den nos turismo a pone cu e entradanan a conoce un reduccion drastico.

 

Un otro ley cu a wordo adapta ta ley di tabaksproducten. E ley cu ser presenta no tawata uno completo y nos a trek in e ley cu Sr. Sneek a entrega y a haci e cambionan debido y a presenta un concepto nobo. E ley ta ensera lo siguiente:

  • Prohibicion general pa huma den areanan publico pa proteha salud di hende y descurasha humamento.
  • A percura pa tur e definicionnan necesario a wordo duna locual ta haci e implementacion mas eficiente.
  • A aumenta e edad pa por cumpra sigaria di 18 pa 21 aña.
  • Mayornan cu ta huma den compania di un menor di edad ta core riesgo pa haña multa. Esaki ta pa proteha e salud di menornan di edad contra e huma di sigaria.

Companianan mester percura pa proteha e salud di su trahadornan tambe. Lo ser prohibo pa parti sigaria por nada y pa bende sigaria los.

E ley aki a wordo amplia y adapta di un manera cu e ta contene tur e elementonan necesario pa por logra e meta di proteha salud di e pueblo en general (secondhand smokers) y pa descurasha humamento na Aruba. Di e manera aki tambe nos como pais lo cumpli cu e exigencianan di e “Framework Convention on Tobacco Control” di Organizacion Mundial di Salud (WHO) y cu nos Plan Nacional di Accion riba Prevencion di “Non-Communicable Diseases” (NCDs). Asina Ministerio di Salud ta sigui traha pa salvaguardia e salud di nos hendenan.

Minister Oduber a splica cu si un persona kier stop di huma e por acudi na su dokter di cas cu por dune tratamiento pa esaki, si ta necesario. Cerca e POH (praktijk ondersteunende huisarts) e por haya conseho y un “motiverende gesprek”. E persona por haya guia tambe cerca Consultorio pa Asuntonan di Adiccion (CAA). Como alternativa tin dos otro instancianan na Aruba cual ta Aruba Hypnosis Center y tambe Agencia Adventista di Desaroyo y Recurso Asistencial) cu ta un organisacion humanitario. Si bo ta huma mas cu 10 biaha pa dia of bo ta huma dentro di e prome 30 minuutnan despues cu bo a caba di lanta for di soño, tin hopi chens cu bo lo cai den remarce pa medicamente por medio di bo dokter di cas.

Minister Dangui Oduber ta conseha pa esnan cu no ta huma, no cuminsa. Pa esnan cu ta huma, pa acudi nan a dokter di cas. Door di stop di huma, bo ta reduciendo e riesgo pa un evento vascular cu 70%.

Minister Oduber kier percura pa tur e leynan aki wordo trata mas pronto cu ta posibel pasobra nan ta hopi importante pa e leynan aki wordo trata y wordo aproba.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio