Home International Expertonan di coronavirus di WHO lo bishita China diahuebs

Expertonan di coronavirus di WHO lo bishita China diahuebs

SHARE

Dies scientifico di World Health Organization (WHO) lo bishita China entrante diahuebs pa investiga e posibel origen di Covid-19, segun autoridadnan a bisa dialuna. Esaki, mas di un aña despues cu e pandemia a cuminsa y memei di acusacionnan cu ta bisa cu Beijing a trata di frustra e investigacion.
E mision tan espera ta di sumo importancia politico na un momento caminda e pandemia di coronavirus a devasta mundo, causando casi dos miyon di morto y practicamente paralizado economia mundial.
E ekipo di WHO “lo inicia un investigacion hunto cu scientificonan Chino, tocante e origen di Covid-19 “, segun e comision nacional di salud a declara den un comunicado cu no a duna mas detayes.
Un retraso di ultimo ora den e mision na comienso di e luna aki a pone cu China a haya un reclamo for di e hefe di WHO.
Director general Tedros Adhanom Ghebreyesus a bisa di ta hopi decepciona pa motibo cu China no a autoriza entrada di e ekipo, mirando cu dos miembro ya caba tawata na caminda.
Pero dialuna el a tweet cu e ta aproba e anuncio di China tocante un “mision critico” pa identifica e origen di e virus y con esaki a pasa for di animal pa e ser humano.
Sin embargo, Peking a trata di minimalisa e tension y e vocero di Ministerio di Relacionnan Exterior, Hua Chunying, a cualifica e sucedido como un “malentendido”.
E expertonan di WHO mester permanece den cuarentena durante dos siman despues di nan yegada, pero ta di spera cu asina esaki pasa, nan lo bishita Wuhan, e ciudad na unda a detecta pa prome biaha e virus mortal aki, na fin di 2019.
Estados Unidos y Australia a lidera dos peticion internacional pa un investigacion independiente tocante e origen di e virus, locual a pone China bou un presion significante.
Beijing a enfrenta critica internacional pa su falta di transparencia durante e brote inicial, aunke ariba nivel nacional e gobierno a elogia su propio maneho di e pandemia.
Funcionarionan di gobierno a bisa na diferente occasion cu e investigacion di e origen di e pandemia ta un “asunto scientifico”, y asta fomenta teorianan cu esaki lo por a origina pafo di China.
Expertos ta bisa cu pa resolve e misterio di con e virus a pasa pa prome biaha for di animal pa e ser humano ta crucial pa preveni otro pandemia, pero e control estricto di China pa locual ta trata e investigacion scientifico ta duna poco speranza pa saca conclusionnan definitivo.
No tin discusion cu e virus a surgi na final di 2019, na un mercado na Wuhan na unda animalnan exotico tawata wordo bendi como alimento y nan ta kere cu e virus a origina den un especie di vleermuis cu ainda no a wordo determina.
E buskeda pa determina e origen tambe a wordo afecta pa teorianan di conspiracion, cu a wordo amplifica door di e presidente di Estados Unidos, Donald Trump, kende a bisa cu esaki a wordo saca for di un laboratorio di virologia na Wuhan.