Reglanan di Protocol y Medidanan anuncia ta conta pa tur sector, incluyendo Hotelnan.

Oranjestad, – Januari 9, 2021 – Crisis Team ta desea di participa cu Reglanan di Protocol y Medidanan anuncia ta conta pa tur instancia y sectornan manera Horeca; incluyendo Hotelnan. No ta asina cu regla ta conta pa algun y pa otronan no. Crisis Team tin contacto regular cu tur sector y ta informa nan di tur desaroyo y cambio di medida. Taskforce Bedrijven tin e tarea di controla si e reglanan y medidanan ta wordo cumpli cu nan. Ademas cada instancia a wordo informa cu nan mester tin un “Compliance Officer”, cual ta un of mas persona cu ta lesa e Protocol y atende cu Management pa percura cu nan ta cumpliendo cu tur Protocol. Recientemente tabata tin un caso na un Hotel Highrise. Aki Taskforce a atende cu e Hotel pa nan haci cambio den nan lobby, pa no tin sintamento na bar ni paramento, tur hende den lobby mester ta sinta na un mesa pa sea come of tuma bebida. Asina mescos ta haci bishita na restaurant – cafés tambe y atende cu nan riba cosnan cu no ta corecto y si nota cu tin hopi punto cu no ta cumpliendo cu ne, Polis por cera e lugar te proximo aviso. Ademas Crisis Team ta desea di recorda trahadornan cu ta traha den un edificio of pafor bao di dak caminda cu no por tene 1.5 meter di distancia cu Tapaboca ta obligatorio. Nengando di bisti Tapaboca no solamente bo ta violando reglanan, pero tambe bo ta perhudica e lugar unda bo ta traha. Ademas bo ta duna un mal ehempel na otro coleganan. Clientenan sea local of bishitantenan no ta bolbe mas y ta bay papia malo di e lugar y di Aruba. Asina bo ta perhudica bo coleganan, bo mes y nos Pais. Mester corda cu tin e posibilidad cu bo mes por ta plamando e virus sin cu bo sa, pesey e tapaboca ta importante. Bo por ta kere cu bo no tin virus pasobra cu bo no tin ningun sintoma, sinembargo algun ora of dia despues cu algun sintoma ta manifesta y bo a test positivo, bo kier lamenta. E ora ey ta laat, ya kisas bo a plama e virus na varios colega y cliente. Pesey den ambiente social tambe, evita di papia cu otronan sin tapaboca bisti, e gotanan microscopico di Covid-19 via aire ta bay di un pa otro facilmente. Pesey ta consehabel na e momentonan aki cu e virus ta plamando fuerte den comunidad pa mantene distancia di 1.5 meter y mantene bo tapaboca bisti. Crisis Team ta compronde cu e Virus berdad a cuminsa cansa nos, sinembargo e si no ta cansa di nos y e ta presente na cualkier sitio of den cualkier combersacion. Sea consciente, sigui e reglanan cu solidaridad y disciplina pa hunto paso pa paso nos vence e pandemia.