ORANJESTAD – E homber Venezolano L.A.N. mester a presenta dilanti Hues pa e caso penal cu Ministerio Publico a cuminsa contra dje.
Aruba Native por a compronde cu tratamento di e caso a sosode via video conference caminda e sospechoso L.A.N. tabata den un oficina na KIA mientras cu den un sala di Corte, Hues, Fiscal y abogado tabata presente pa trata e caso.
E acusacion cu Fiscal a presenta contra L.A.N. ta cu dia 17 September 2020, e tabatin un arma di candela. Ta trata aki di un revolver cu balanan. Ta asina cu L.A.N. a admiti. Hues a bisa cu Polis a haya informacion cu L.A.N. cu su rumannan, riba 8 September 2020 tabata kier a mata un hende door di cu a horta un lote di droga. Polis haci razia na e cas y bao cama a haya e arma.
L.A.N. a bisa Hues cu e ta culpable pa e arma pero ta desmenti categoricamente cu e y su rumannan lo kier a mata un hende door di a horta un lote di droga.
Hues a bisa cu desde 1 Januari 2020, L.A.N. a yega Aruba ilegal cu boto. Segun L.A.N., el a haya e arma patras di e cas banda di un baranca y a coy e arma. El a bisa cu nunca e tabatin un arma di candela y nunca a tira un arma. El a bisa Hues cu e asunto aki a perhudica su famia na Venezuela. El a bisa cu el a bin Aruba pa traha pa mantene su famia.
Hues a bisa cu na Polis L.A.N. a declara cu e tabatin e arma pa su defende su mes. Ta asina cu esnan cu tabata den e cas a wordo deporta y L.A.N. ta lamenta esey pasobra nan no tin nada di haci cu e asunto aki.
Fiscal a remarca cu e balanan den e arma tabata “hollow point”. Segun L.A.N. e no sa nada di arma y menos di balanan.
Fiscal ta haya legalmente proba cu L.A.N. tabatin un arma di candela y carga cu bala. Fiscal no ta kere cu L.A.N. lo a haya e arma abao den un saco. El a mustra cu L.A.N. a declara na Polis cu e tabatin e arma pa defende su mes. E balanan cu a haya den e arma ta sumamente peligroso. Fiscal a bisa cu e ta tuma L.A.N. na malo cu e ta haci algo asina. Fiscal a exigi 9 luna di prison di cual 3 luna ta condicional.
Hues a sera tratamento di e caso y a dicta sentencia di biaha. Hues ta haya legalmente proba cu L.A.N. tabatin un arma di candela cu balanan. Hues a mustra cu posecion di arma di candela, ta un problema serio na Aruba. Nan ta causa hopi problema di atraco te asesinato. Arma ta wordo usa pa haci malo. Hues a tuma L.A.N. na malo pa esey. Hues ta haya cu no tin motibo pa desvia pa e orientacion di castigonan di Corte. E ta haya e castigo exigi pa Fiscal ta hopi razonabel y ta condena L.A.N. na 9 luna di prison di cual 3 luna ta condicional cu 2 aña di prueba.