Compilacion di algun suseso cu a pasa riba e fecha di awe.
03 januari 1965: Homber a wordo hinca fatalmente den cura di un cas den Balanderstraat, yama antes Eaglewijk
Den oranan di atardi, e homber Chr O. (30) kende tabata chauffeur di un supermercado a wordo hinka pa W.S. de L. (36) kende tambe tabata un chauffeur pero di un panaderia. E homber Chr. O. a keda gravemente herida y na caminda pa San Pedro Hospital ela fayece. E agressor a keda deteni mesora na e sitio.
Den careda di 4’or y mey a drenta un melding na polis cu den Balanderstraat tin un caso serio di hincamento. Na yegada polis a topa cu e victima di 30 aña cu un hinca profundo den su garganta. Na caminda pa hospital e victima a fayece. Durante investigacion a sali na cla cu e victima y e asesino tabata bon amigo y door cu tabata un dia liber nan a cuminsa bebe for di oranan trempan, mainta nan a bebe na Eagle despues nan a bay Sero Patrishi pa sigui bebe. E dos amigonan a bebe di mas y na dado momento na e cas den Balanderstraat nan a cuminsa bringa cu otro paden y a sigui bringa cu otro pafo den cura di e cas. E homber W.S. I. a pasa man pa un cuchiu di 20 cm y a hinca e victima den su garganta. E asesino a admiti dilanti polis cu e la hinca su amigo mata. E defunto tabata biba den Canoastraat.
03 di januari 1965. Marineronan burachi a agredi chauffeur di autobus/taxi
Den careda di 1’or di marduga, E chauffeur di autobus/Taxi, l.J. (59) a hay’e den problema cu algun miembro di tripulante di un barco Sueco. E miembro di tripulantenan aki tabata basta bou influencia na momento cu nan a subi den su auto. E problemanan a start manera nan a subi den auto y a cuminsa bay direccion di San Nicolas, caminda nan barco tabata mara. Tur cos a cuminsa ora un di nan kier a kita e stuur for di e chauffeur di taxi/ autobus, pero e chauffeur a logra kit’e na tempo bek. Un di marineronan a cuminsa coba den e dashboard di e auto y saca tur cos afo. Un cu tabata sinta patras di e chauffeur a trata na choca e chauffeur, mientras un otro a dal’e algun mokete. E chauffeur pa salba su bida, mesora a pensa di para e auto dilanti ldi warda di polis na balashi. Mesora e la logra baha y a pidi pa polis pa yude. Mirando e situacion di e marineronan, no a keda nada otro cu detenenan. E chauffeur a keda herida di e moketenan cu e a ricbi y mester a wordo trata pa un dokter.
03 januari 1983: Auto ta cay den e buraco na Natural Bridge
Un famia turista cu a bay bishita Natural Bridge a para nan auto y despues cu nan a baha, e chauffeur a lubida di hisa e handrem y e auto a bay dilanti y cay den e buraco di Natural Bridge. No tabata tin herida y e compania di huur auto a busca un takelwagen pa saca e auto for di e buraco.
03 di januari 1984: Hincamento fatal cerca di antes Peace Palace den Van Walbeekstraat
Algo pasa di mey anochi, cerca di unda antes Peace Palace tabata keda den Van Walbeekstraat a sosode un bringamento den cual un homber H.A.Lampe di 29 aña a haya un algun hinca y un ora despues cu e la yega hospital e la fayece na e heridanan cu e la ricibi. Den careda di 1’or di marduga presencia di polis y ambulance a wordo pidi cu hopi urgencia den e caya Van Walbeekstraat caminda un persona durante un pelea a wordo seriamente hinca. Mesora e victima a wordo transporta pa hospital y despues di un operacion, den careda di 2’or e la fayece. Recherchenan a logra detene mesora dos sospechoso den e caso aki.